काठमाण्डौ। दसैँ हवाई सेवा प्रदायक कम्पनीका लागिमात्र होइन सबै क्षेत्रको व्यापार–व्यवसायका लागि उत्साहजनक हुन्छ। त्यसमध्ये सबैभन्दा बढी आकर्षक व्यवसाय हवाई कम्पनीकै हुन्छ। किनकि केही महँगो भए पनि हवाईजहाज चढेर गन्तव्यतर्फ जानुको मज्जा नै बेग्लै हुन्छ। त्यसै पनि उत्साहजनक व्यापार हुने हवाई क्षेत्रका लागि दसैँ निकै महत्वपूर्ण अवसर हो।

कोभिड महामारीले नराम्ररी थलिएको मुलुकको पर्यटन क्षेत्र र त्यसमा पनि बढी प्रभावित बनेको हवाई क्षेत्र विस्तारै लयमा फर्किंदैछ। नजिकै आउँदै गरेका दसैँ, तिहार, छठलगायत पर्व तथा पदयात्रा र पर्वतारोहणको याम भएकाले पनि अहिले आन्तरिक तथा विदेशी पर्यटकको चहलपहल बाक्लिएको छ।

यसै सन्दर्भमा दसैँतिहारलाई लक्षित गरेर हवाई कम्पनीले विभिन्न अफर र छुटको प्याकेज सार्वजनिक गरिरहेका छन्। दसैँमा त्यसै पनि भरिभराउ हुने हवाई उडान यात्रुको मागका आधारमा उडान संख्या थपेर भए पनि सेवा सञ्चालनमा तम्तयार छन्, वायुसेवा कम्पनीहरु पनि।

ठूला एयरलाइन्सको दसैँका लागि ७० प्रतिशतभन्दा बढी बुकिङ भइसकेको छ। दसैँका लागि केही उडान संख्या थपिने बुद्ध, यती र सौर्य एयरलाइन्सले जनाएका छन्। शरद ऋतुको सफा मौसममा हिमाल डाँडापखेराको दृश्यावलोकन गर्दै सहज र सुलभ यात्राका लागि यात्रु पनि निकै इच्छुक छन्। सडकमार्गको अवस्था राम्रो नभएको र गन्तव्यमा पुग्न निकै झन्झट व्यहोर्नुपर्ने बाध्यताले यात्रुले थोरै रकम महँगो भए पनि हवाई यात्रा नै रोज्छन्।

आन्तरिक उडानका ठूला वायुसेवा प्रदायक बुद्ध एयर, यती एयरलाइन्स, सौर्य एयर, गुण एयरलाइन्सलगायतले दसैँ बिजनेसका लागि साबिकको उडान संख्या बढाएर यात्रुको मागअनुरुप सेवासुविधा विस्तारमा जुटेका हुन्। ठूला एयरलाइन्सले विभिन्न अफर पनि सार्वजनिक गरेका छन्।

यतीको स्कुटरदेखि हीरा जित्ने मौका

यती एयरलाइन्सले दसैँ, तिहार र छठ पर्वलाई लक्षित गरेर आफ्ना यात्रुका लागि विभिन्न उपहार योजना सार्वजनिक गरेको छ। एयरलाइन्सले दसैँतिहार योजनाअन्तर्गत यात्रुले स्कुटरदेखि हीरासम्मका उपहार प्राप्त गर्न सक्ने जनाएको छ। उक्त अभियानमा प्रथम विजेतालाई यामाहाको फसिनो १२५ एफआई स्कुटर, दोस्रो विजेता एक जोडीका लागि दुबई जाने–आउने हवाई टिकट र तेस्रो हुनेलाई हीराको टप प्रदान गरिने एयरलाइन्सले जनाएको छ। यो योजना असोज २१ गतेदेखि कात्तिक २४ गतेसम्म यती एयरलाइन्समार्फत उडान गर्ने सम्पूर्ण यात्रुमा लागू हुनेछ।

अग्रिम टिकट बुकिङ गरी यसै समयावधिमा उडान गर्ने सम्पूर्ण यात्रुलाई पनि यो योजना लागू हुने कम्पनीले जनाएको छ। भोलिबाट ३४ दिनसम्म चल्ने यस योजनाअन्तर्गत प्रथम पुरस्कारको प्रायोजन यामाहाको आधिकारिक बिक्रेता एमएडब्ल्यू इन्टरप्राइजेज, दोस्रो पुरस्कार सस्तो टिकट अनलाइन ट्राभल एजेन्सी र तेस्रो पुरस्कार श्री बालाजी डाइमन्डले प्रायोजन गरेको हो।

हर्षोल्लासका साथ मनाइने नेपालीको महान चाडहरुमा यती एयरलाइन्समार्फत यात्रा गर्ने सम्पूर्ण यात्रुलाई लक्षित गरेर यो योजना सञ्चालन गरिएको र यात्रुले पनि आरामदायी र सुरक्षित यात्रासँगै उपहार प्राप्त गरी खुसी साटासाट गर्न सकून् भन्ने उद्देश्य रहेको एयरलाइन्सका प्रवक्ता सुदर्शन बर्तौलाले जानकारी दिए। 

अफर कसरी प्राप्त गर्ने ?

यतीको दसैँ अफरमा सहभागी हुनका लागि एयरलाइन्सका यात्रुहरुले यात्रा अघि विमानस्थलमा सुरक्षा जाँच गरी भित्र छिर्ने क्रममा बोर्डिङ पाससँगै प्राप्त गर्ने ‘लक्की ड्र’ कुपन भरेर ड्रप बक्समा खसाल्नुपर्नेछ। एकतर्फी यात्रा गर्दा एउटामात्र कुपन पाइनेछ भने सोही अवधिका लागि एकैपटक दुईतर्फी टिकट काटेर यात्रा गर्दा एकतर्फीमै दुईवटा कुपन पाइने बताइएको छ। अर्थात् एकैपटक दुईतर्फी टिकट लिएर यात्रा गर्दा एकैजनाले चारवटा ‘लक्की ड्र’ कुपन पाउनेछन्। ‘यती एयरलाइन्सको जहाजबाट जति धेरै यात्रा गर्नुहुन्छ, त्यति नै धेरै उपहार जित्ने सम्भावना रहनेछ’, प्रवक्ता बर्तौला बताउँछन्। 

असोज २१ देखि कात्तिक २४ गतेसम्म भरिएका कुपनहरुलाई संकलन गरी गोलाप्रथामार्फत प्रथम, द्वितीय र तृतीय विजेता छुट्याइने र यसको जानकारी आफ्ना सोसल मिडियामार्फत सार्वजनिक गरिने यती एयरलाइन्सले जनाएको छ। 

हाल यतीले पाँचवटा एटिआर–७२ विमानमार्फत विभिन्न आठवटा गन्तव्यमा उडान भर्दै आएको छ।

बुद्धको विशेष अफर

आन्तरिक उडानको अग्रणी वायुसेवा प्रदायक बुद्ध एयरले पनि आफ्ना ग्राहकका लागि विशेष आकर्षक अफर ल्याएको छ। कम्पनीले आफ्नो २४औँ वार्षिकोत्सवका अवसर पनि भएकाले दसैँतिहारका लागि अफर नभनी विशेष अफर सार्वजनिक गरेको हो। बुद्ध एयरका सूचना अधिकारी दीपेन्द्रकुमार कर्णका अनुसार कम्पनीको यही असोज २५ गते पर्ने वार्षिकोत्सवलाई लक्षित गरेर यात्रुका लागि अफर जनाएको छ। मोबाइल एपबाट टिकट खरिद गर्दा ‘लक्की ड्र’ मार्फत निःशुल्क टिकट उपलब्ध गराइरहेको छ। हरेक गन्तव्यबाट काठमाण्डौ फर्किंदा रिटर्न टिकट निःशुल्क दिइनेछ। अफर योजनाअन्तर्गत हरेक दिन दुईजनालाई निःशुल्क टिकट दिइनेछ। यो योजना अगस्ट १ देखि ११ तारिखसम्म कायम गरिएको कम्पनीले जनाएको छ।

बुद्ध एयरले अहिले दैनिक १४० भन्दा बढी उडानमार्फत करिब ८ हजार यात्रुलाई सेवा दिइरहेको छ। कम्पनीको दसैँको बुकिङ ७० प्रतिशतभन्दा बढी छ। दसैँमा यात्रुको मागबमोजिम उडान थप गर्नका लागि नियामक नेपाल नागरिक उड्डयन प्राधिकरणलाई आग्रह गरिने कम्पनीको भनाइ छ।

बुद्ध एयरले थप नयाँ एटीआर जहाज भित्र्याउँदै 

आन्तरिक उडानको सबैभन्दा बढी जहाज र उडान हिस्सा ओगट्ने अग्रणी वायुसेवा प्रदायक बुद्ध एयरसँग अहिले १३ थान एटिआरसहित १५ थान जहाज छन्। कम्पनीको १६ औँ जहाज आगामी डिसेम्बर महिनाभित्रै नेपाल भित्रिने जनाएको छ। बुद्धले १४औँ एटीआर जहाज भित्र्याउन लागेको हो। एटीआर–७२ जहाज भित्रिएपछि प्रमुख गन्तव्यको उडानमा सहजता हुने कम्पनीले विश्वास लिएको छ।

श्री एयरलाइन्सले पनि आफ्ना ६ जहाजमार्फत उडान सञ्चालन गरिरहेको छ। दसैँमा यात्रुको मागअनुरुप उडान संख्या बढ्नसक्ने कम्पनीले जनाएको छ। गुण एयरलाइन्सले ५ वटा जहाजमार्फत सेवा सञ्चालन गरिरहेको छ। पर्यटकीय याम पनि भएकाले हेलिकप्टरको उडानमा पनि चाप बढेको छ।

दसैँमा कुन एयरलाइन्सका कति उडान ?

सामान्य अवस्थाभन्दा दसैँमा एयरलाइन्सको उडान चाप हुन्छ। यात्रुको संख्या अत्याधिक भएपछि कम्पनीले उडान संख्या थपेर भए पनि सेवा दिन्छन्। यो पटकको दसैँमा पनि हवाई यात्रुको अत्यधिक चाप हुने एयरलाइन्सको भनाइ छ। अहिले आन्तरिक उडान व्यवस्थापन गर्न पनि विमानस्थललाई हम्मेहम्मे परेको छ। एक घन्टाको अन्तरालमा १५ भन्दा बढी उडान व्यवस्थापन गर्नुपरिरहेको छ।
एयरलाइन्सका अनुसार हवाई उडान संख्या बढेसँगै विमानस्थलको आन्तरिक उडानमा समस्या आएको छ। क्षेत्रीय हब विमानस्थलमा स्लट व्यवस्थापन नहुँदासम्म यो समस्या कम नहुने एक एयरलाइन्सका अधिकारीको बुझाइ छ। अहिले बुद्धको १४०, यतीको करिब ५०, श्री एयरलाइन्सको १६ र सौर्यको आठ तथा गुणलगायत एयरलाइन्सको उडान संख्या पनि बढेको छ।

विमानस्थलमा एयर ट्राफिक जाम

त्रिभुवन अन्तर्राष्ट्रिय विमानस्थलको आन्तरिक उडानमा चाप बढेकाले एयर ट्राफिक व्यवस्थापनमा पनि चुनौती थपिएको छ।

एयर ट्राफिक जामले यात्रुको गुनासो बढेको छ। जहाज लामो समयसम्म होल्ड हुनुपर्ने अवस्था छ। २० मिनेटदेखि डेढ घन्टासम्म जहाज होल्ड हुने गरेको बताइएको छ। क्षेत्रीय विमानस्थल बेस भएर उडान गर्ने भनिए पनि अहिले सबै वायुसेवा प्रदायकले काठमाण्डौ विमानस्थलबाटै पहिलो उडान गर्ने भएकाले विमानस्थलमा ट्राफिक जाम हुने गरेको छ।

विमानस्थलले भने उडान चापलाई दृष्टिगत गरी आवश्यक व्यवस्थापनमा जुटेको जनाएको छ। विमानस्थलका प्रवक्ता रिन्जी शेर्पाका अनुसार सामान्य अवस्थामा भन्दा दसैँ, तिहारलगायत चाडपर्वका बेला जहाजको उडान संख्या स्वाभाविक रुपमा बढ्छ। यसपटक वायुसेवा प्रदायकको जहाज संख्या पनि बढेको र सेडुल उडान पनि बढी भएकाले त्यति धेरै समस्या नहुने अनुमान गरिएको छ। ‘सामान्य अवस्थाभन्दा अक्टोबर महिनाभर उडान संख्या बढ्छ। उडान संख्या बढ्नसक्ने अवस्थाको आँकलन गरी पूर्वाधारको तयारीमा जुटेका छौँ, त्यो भनेको स्लट व्यवस्थापन मिलाउने र भरसक बिहान र दिउँसो मात्रै चाप हैन साँझको उडानलाई प्राथमिकता दिनेगरी व्यवस्थापन गरिरहेका छौँ’, प्रवक्ता शेर्पाले भने।

राति ९ बजेसम्म उडान

काठमाडौं विमानस्थल बिहान ६ देखि साँझ ७ बजेसम्म सञ्चालन हुन्छ। काठमाण्डौबाट छुटेका जहाज गन्तव्य पुगेर फर्किंदा राति ८ः३० देखि ९ः१५ बजेसम्म समय लाग्छ। यसरी हेर्दा आन्तरिक उडान पनि राति ९ बजेसम्म सञ्चालन भइरहेको छ। विशेषगरी क्षेत्रीय हब विमानस्थल रात्रिकालीन उडान योग्य भएकाले पनि उडान व्यवस्थापनमा सहजता आएको विमानस्थलको भनाइ छ।

सामान्य अवस्थामा भन्दा दसैँका बेला दैनिक १० देखि १५ उडान सङ्ख्या बढ्न सक्ने विमानस्थलले जनाएको छ। अहिले आन्तरिकतर्फ दैनिक करिब ३०० उडान भइरहेको छ।

 

- RSS