काठमाण्डौ । अर्थमन्त्री जनार्दन शर्माले आर्थिक वर्ष २०७८/७९ को बाँकी ६ महिनामा सतप्रतिशत पुँजीगत खर्च गरिसक्न विभिन्न मन्त्रालयलाई आग्रह गरेका छन्। 

अर्थ मन्त्रालयमा मंगलबार आर्थिक वर्ष २०७८/७९ को हालसम्मको खर्चको समीक्षा बैठकमा अर्थमन्त्री शर्माले सचिवहरुलाई यस्तो आग्रह गरेका हुन्। आवश्यक परे मध्यरातमा पनि आफू सहयोग गर्न तयार रहेको भन्दै उनले जसरी पनि खर्च गर्न आग्रह गरे। ‘आर्थिक वर्षको ६ महिना बितिसक्यो। बाँकी ६ महिनामा सतप्रतिशत बजेट खर्च गर्नुपर्छ’, उनले भने, ‘त्यसका लागि मैले रातको १२ बजे पनि तपाइँहरुलाई सहयोग गर्न तयार छु।’

मन्त्री शर्माले बजेट खर्च गर्ने अन्य उपायहरु खोज्न र जसरी पनि खर्च बढाउन आग्रह गरे। 

शर्माले ठूला योजनाहरुमा स्थानीय तह र स्थानीय जनतालाई समेत सहभागी गराएर अगाडि बढाउनुपर्नेमा जोड दिए। ठूला योजनाहरुमा अपनत्वका लागि उनीहरूलाई सहभागी गराएरमात्र छिटो काम गर्न सकिने उनको भनाइ थियो। 

विद्यमान प्रणालीमा सुधार गर्नुपर्ने आवश्यकता पनि शर्माले औँल्याए। उनले फाइल हरेक मन्त्रालयमा बोकेर हिँड्दा ढिला हुने भन्दै अब डिजिटल माध्यममा लैजानुपर्ने बताए। ‘फाइल बोकेर विभाग, मन्त्रालय धाउँदा दुई–चार दिन जान्छ। यहाँ पनि समय गइरहेको छ’, उनले भने, ‘यसलाई डिजिटल माध्यममा लैजानुपर्यो। डिजिटलमै अनुरोध गर्ने र स्वीकृति गर्ने हुनुपर्यो। टिप्पणी उठाएर राख्ने काम आफ्नो ठाउँमा गर्नुपर्छ।’

पछिल्लो समय पुँजीगत खर्च बढाउन अर्थ मन्त्रालयले अन्य मन्त्रालयलाई ताकेता गर्दै आएको छ। 

यसैबीच सोमबारसम्मको तथ्यांकअनुसार पुँजीगत खर्च ९.३९, चालु खर्च ३८.९ र वित्तीय खर्च २५.४१ प्रतिशत खर्च भइसकेको छ। समग्रमा हालसम्म २९.११ प्रतिशत बजेट खर्च भइसकेको छ।