काठमाण्डौ । कोरोना महामारीबीच सबैको लघुवित्त वित्तीय संस्था लिमिटेडले चालु आर्थिक वर्षको तेस्रो त्रैमासमा अधिकांश वित्तीय सूचकमा उत्कृष्ट प्रदर्शन गरेको छ।

आज सार्वजनिक अपरिष्कृत वित्तीय विवरणअनुसार सबैको लघुवित्तले समीक्षा अवधिमा ७ करोड ९२ लाख रुपैयाँ खुद नाफा आर्जन गरेको छ। यो नाफा गत वर्षको यही अवधिको तुलनामा २२२.१३ प्रतिशतले बढी हो। गत वर्ष यही अवधिमा संस्थाले २ करोड ४६ लाख रुपैयाँ खुद नाफा आर्जन गरेको छ।

संस्थाको सञ्चालन मुनाफा पनि १०८.२२ प्रतिशतले बढेर ८ करोड १३ लाख रुपैयाँ भएको छ। गत वर्ष यही अवधिमा संस्थाको सञ्चालन मुनाफा ३ करोड ९० लाख रुपैयाँ रहेको थियो।

समीक्षा अवधिमा संस्थाको खुद ब्याज आम्दानी पनि ७३.७८ प्रतिशत बढेर १४ करोड ६३ लाख रुपैयाँ भएको छ। गत वर्ष यही अवधिमा संस्थाको खुद ब्याज आम्दानी ८ करोड ४२ लाख रुपैयाँ रहेको थियो। 

संस्थाले यो अवधिमा २ अर्ब १७ करोड रुपैयाँ सापटी लिई ३ अर्ब १० करोड रुपैयाँ कर्जा परिचालन गरेको छ। गत वर्ष यही अवधिमा संस्थाले १ अर्ब ५३ करोड रुपैयाँ सापटी लिई १ अर्ब ९९ करोड रुपैयाँ कर्जा लगानी गरेको थियो। 

संस्थाले रिजर्भको आकार १७७.१४ प्रतिशतले बढाउँदै ९ करोड ३१ लाख रुपैयाँको उचाइमा पुर्याएको छ। गत वर्ष रिजर्भमा ३ करोड ३६ लाख रुपैयाँ रहेको थियो।

चुक्तापुँजी २० करोड ६० करोड रुपैयाँ रहेको संस्थाको ईपीएस ५१.३० रुपैयाँ पुगेको छ। पीई रेसियो ३०.९९ गुणा रहेको संस्थाको प्रतिसेयर नेटवर्थ १४५.२३ रुपैयाँ रहेको छ।