काठमाण्डौ । अन्तर्राष्ट्रिय मुद्रा कोष (आईएमएफ) बाट नेपालमा आएको मिसन टोलीका प्रमुख जार्को टुरुनेनको टोलीसँग बैंक तथा वित्तीय संस्था परिसंघ, नेपाल (सिबिफिन) को नेतृत्वले बुधबार भेटवार्ता गरी नेपालको वर्तमान आर्थिक अवस्थाका विषयमा सघन छलफल गरेको छ। 

छलफलमा आईएमएफ नेपालका आवासीय प्रतिनिधि टेरेसा डबान सान्चेज, आईएमएफ– वासिङ्टन डीसी अमेरिकाका वरिष्ठ अर्थशास्त्री रसेल ग्रीन र सिबिफिनका तर्फबाट उपाध्यक्ष राजेश उपाध्यक्ष, महासचिव राजनसिंह भण्डारी, कार्यकारिणी सदस्य राधेश पन्त तथा सिबिफिनका महानिर्देशक डा. गोपालप्रसाद तिवारीको सहभागिता थियो।

नेपालको भ्रमणमा रहेको उक्त मिसनका प्रमुख जार्को टुरुनेनले नेपालको अर्थतन्त्रको वर्तमान अवस्थाको समीक्षा र कोभिडपछिको परिदृश्यहरुका विषयमा सरोकारवालाहरुसँग परामर्श गर्न नेपालमा आएको बताए। 

सिबिफिनका प्रतिनिधिहरुले आयात, तरलताको समस्या र त्यसको असर, बैंक तथा वित्तीय संस्थाको मुनाफामा देखिएको संकुचन, पुँजीबजारमा आएको गिरावट, संस्थापक सेयरलाई सर्वसाधारण सेयरमा रुपान्तरण गर्न सकिने बाफियाको व्यवस्थाको कार्यान्वयनको अवस्था, निष्क्रिय कर्जामा भइरहेको वृद्धि, ब्याजदर, कर्जायोग्य पुँजीको अभावलगायतका विविध विषयमा आईएमएफका प्रतिनिधिसमक्ष जानकारी प्रस्तुत गरेका थिए। 

आईएमएफबाट आएको मिसन टोलीका प्रतिनिधिहरुले नेपालको हालको आर्थिक कठिनाइहरुका बारेमा अध्ययन गरी प्रतिवेदन तयार गर्ने जानकारी गराएका थिए। 

सिबिफिनको कार्यालय सुन्धारामा सम्पन्न छलफल अर्थपूर्ण भएको र आगामी दिनमा समेत आईएमएफले आर्थिक तथा बैंकिङ क्षेत्रका विविध विषयहरुमा सिबिफिनसँग गरिरहेको छलफल र सहकार्यलाई जारी राख्ने जनाइएको छ।