सेबोनको माग पूरा गर्ने प्रतिबद्धतासँगै आजै तिलक कोइरालाले अनशन तोड्ने

– रेखा चन्द

काठमाण्डौ । नेपाल धितोपत्र बोर्ड (सेबोन)ले लगानीकर्ताका माग सम्बोधन गर्ने प्रतिबद्धता जनाएपछि आजै तिलक कोइरालाले आमरण तोड्ने सक्ने बताइएको छ। 

पुँजीबजार सुधार र विकासका १९ बुँदे माग अघि सार्दै पुँजीबजार सुधार संघर्ष समितिका संयोजक कोइरालाले गत असार १ गतेदेखि सेबोन कार्यालयबाहिर आमरण अनशनमा बसेका छन्। आज आमरण अनशनको १० औँ दिन हो।

लगानीकर्ताले उठाएका मागहरु कार्यान्वयन गर्न सेबोन र संघर्ष समितिबीच लगभग सहमति भएको छ। भर्खरै लगानीकर्ताका एकजना प्रतिनिधि भित्र गएर सेबोन अध्यक्ष रमेशकुमाल हमालसँग कुराकानी गरेर फर्किएका छन्। ती प्रतिनिधिका अनुसार अबको केहीबेरमै सेबोन अध्यक्ष र अनशनरत कोइरालाबीच मागहरु पूरा गर्ने सेबोनको प्रतिबद्धतापत्रमा हस्ताक्षर हुनेछ। 

त्यसपछि कार्यान्वयन समिति गठन हुनेछ। अनि त्यो कार्यान्वयन समितिको बैठकले कुन–कुन माग कुन निकाय पूरा गर्ने र कति समयावधिमा पूरा गर्ने भन्ने कुरा निक्र्यौल गर्नेछ। त्यसमा सेबोन अध्यक्षले प्रतिबद्धता जनाउनेछन्। त्यसपछि कोइरालाले अनशन तोड्ने बताइएको छ।