धनगढी । नेपाल उद्योग बाणिज्य महासंघ (एफएनसीसीआई)को आसन्न निर्वाचनमा वरिष्ठ उपाध्यक्ष पदका प्रत्याशी अन्जन श्रेष्ठले आफूले संस्थाको व्यवसायीक क्षमता अभिवृद्धिका साथै संस्थागत प्रभावकारीता बढाउन कार्य गर्ने बताएका छन्।

वरिष्ठ उपाध्यक्षका प्रत्याशी श्रेष्ठले शनिबार धनगढीमा आयोजित नेपाल उद्योग बाणिज्य महासंघ सुदूरपश्चिम प्रदेशको छैटौँ प्रदेशसभाको सफलताको शुभकामना दिँदै आफ्नो नेतृत्वमा व्यवसायीहरुको समस्यारुपी घाउमा मलम लगाउन र पीडामा रहेको व्यवसायलाई उकास्न भूमिका निभाउने बताए। ‘अर्थतन्त्र लथालिंग भएको अवस्थामा व्यवसायीका समस्याहरु सुनिनुपर्दछ र यसका लागि महासंघलाई सबै तहका उद्योगी व्यवसायीहरुको पहुँचमा हुनेगरी काम गर्नुपर्दछ’, श्रेष्ठले भने, ‘करका विषय नापतौल र मिसम्याचका विषयलगायत ऋण तिर्नेजस्ता आर्थिक समस्या छन्। यस्ता विषयहरुलाई सम्बोधन गर्न भनेर नै मैले विज्ञसहितको टिम तयार गरेको छु।’

श्रेष्ठले सुदूरपश्चिम प्रदेशमा पर्यटन र कृषिको अथाह सम्भावना रहेको भन्दै यसलाई विस्तार गर्न पनि युवा र जुझारु नेतृत्व चाहिने बताए। ‘मैले लामो समयदेखि महासंघको विभिन्न तहमा बसेर कार्य गर्दै आएको छु। यसले मलाई उद्योगी–व्यवसायीहरुको समस्या बुझ्न सहयोग गरेको छ’, उनले भने, ‘मेरो टिमअन्तर्गतका विभिन्न उपाध्यक्ष तथा अन्य सदस्यहरुसमेत समावेशी युवाहरु छन्।’

आफ्नो टिमका तर्फबाट जिल्ला÷नगरतर्फको उपाध्यक्षमा अरुणराज सुमार्गी, वस्तुगत उपाध्यक्षमा मनिषलाल प्रधान तथा एसोसिएट्स उपाध्यक्षमा ज्योत्सना सुब्बा श्रेष्ठ उम्मेदवार रहेको उनले जानकारी दिए। उनले आफूले महासंघमा लामोसमदेखि विभिन्न भूमिकामा रहेर नयाँ विषयहरु सिक्दै रहेको र अन्य साथीहरुलाई समेत सिकाउँदै आएको बताए।

श्रेष्ठले आफूले व्यवसायीहरुको पीडालाई सम्बोधन गर्नकै लागि र लथालिंग अर्थतन्त्रलाई सम्हाल्नेगरी प्लेटफर्म तयार पारेको भन्दै सबैलाई त्यसमा सहकार्य र सहभागी हुन आग्रह गरे। ‘मेरो नेतृत्वमा तपाइँहरुलाई संस्थाको हरेक कार्यमा आबद्धता गराउने र अपनत्व दिलाउने प्रतिबद्धता व्यक्त गर्दछु, आउनुस् सबै मिलेर सहकार्य गरौँ’, उनले भने।