सयपत्री हाइड्रोपावरको पावरहाउसमा माटोको लेदो थुप्रियो, विद्युत् उत्पादन बन्द

काठमाडौं। सयपत्री हाइड्रोपावर लिमिटेडले बागलुङको ताराखोला गाउँपालिकामा सञ्चालित आयोजनास्थलमा बाढीका कारण थप क्षति भएको जनाएको छ।

कम्पनीका अनुसार बाढीका कारण आयोजनाको स्विचयार्डदेखि नेपाल विद्युत् प्राधिकरणको हरिचौर सबस्टेसनसम्म रहेको ३३ केभी प्रसारण लाइनका पोल तथा तारमा क्षति पुगेपछि विद्युत् उत्पादन तथा प्रसारण कार्य बन्द रहेको छ। यसअघि पनि कम्पनीले बाढीका कारण विद्युत् उत्पादन तथा प्रसारण अवरुद्ध भएको जानकारी गराएको थियो।  

कम्पनीका अनुसार पछिल्लो घटनामा आयोजनाको पावरहाउसबाट करिब १०० मिटर माथिबाट माटोको लेदो बगरसहित आएर पावरहाउसको पछाडिपट्टि ठूलो मात्रामा थुप्रिएको छ। यसका कारण विद्युत् उत्पादन कार्य पूर्ण रूपमा बन्द रहेको कम्पनीले जनाएको छ।

कम्पनीले आयोजनास्थलमा मानवीय क्षति नभएको तथा हेडवर्क्स, पाइपलाइन, पावरहाउस भवन र कर्मचारी आवासगृहलगायत अन्य संरचनामा कुनै प्रकारको क्षति नभएको जानकारी दिएको छ।

हाल पावरहाउसमा थुप्रिएको माटोको लेदो सफा गर्ने तथा क्षतिग्रस्त ३३ केभी प्रसारण लाइनका पोल र तारको मर्मतसम्भार गर्ने कार्य अघि बढाइएको कम्पनीले जनाएको छ।

सम्भव भएसम्म छिटो विद्युत् उत्पादन तथा प्रसारण सेवा पुनः सञ्चालन गर्ने प्रतिबद्धता पनि कम्पनीले जनाएको छ। कम्पनीको आयोजनासम्बन्धी ३३ केभी प्रसारण लाइन स्विचयार्डदेखि हरिचौर सबस्टेसनसम्म जोडिएको विवरण सरकारी अभिलेखमा समेत उल्लेख छ।