भोटेकोशी बाढीपछि ४३० मेगावाट विद्युत् अवरुद्ध, वैकल्पिक व्यवस्थापनको तयारी

काठमाडौँ। रसुवाको भोटेकोशी नदीमा आएको बाढीका कारण विभिन्न जलविद्युत् आयोजनामा क्षति पुगेपछि करिब ४३० मेगावाट विद्युत् राष्ट्रिय प्रसारण प्रणालीबाट बाहिरिएको छ। विद्युत् आपूर्ति प्रभावित भएपछि सरकारले वैकल्पिक व्यवस्थापनको तयारी थालेको छ।

त्रिशूली करिडोरबाट काठमाडौँको बालाजु र चपलीमा आउने विद्युत् अवरुद्ध हुँदा ती प्रसारण लाइनमा चाप परेको छ। ऊर्जा, जलस्रोत तथा सिँचाइ मन्त्रालयका प्रवक्ता मोहनकुमार शाक्यका अनुसार वैकल्पिक आपूर्ति प्रणाली विकासका लागि नेपाल विद्युत् प्राधिकरणले ‘टास्क फोर्स’ बनाएर काम अघि बढाएको छ।

हिउँदको विद्युत् माग व्यवस्थापनलाई ध्यान दिँदै मन्त्रालय, प्राधिकरण, सडक विभाग र काठमाडौँ महानगरपालिकाबीच थप भूमिगत ग्रिड निर्माण तथा भूमिगत तार व्यवस्थापनबारे छलफल भएको छ। सडक विभाग र महानगरपालिकाले आवश्यक सहयोग र सहकार्य गर्ने प्रतिबद्धता जनाएका छन्।

प्राधिकरणका सम्बन्धित अधिकारीहरूले काठमाडौँ उपत्यकाको भूमिगत तार व्यवस्थापनलाई थप व्यवस्थित गर्दै हिउँदे विद्युत् माग व्यवस्थापनमा सहकार्य गर्ने बताएका छन्। प्राधिकरण सञ्चालक समिति सदस्य अंशुकिरण शाहीले हिउँदको विद्युत् चाप व्यवस्थापनका लागि सबै निकायबीच उच्चस्तरीय सहकार्य आवश्यक रहेको बताए।