दोधारा चाँदनी र भीमदत्तनगर जोड्ने झोलुङ्गे पुल भत्कियो, आवागमन बन्द

कञ्चनपुर। दोधारा चाँदनी र भीमदत्तनगर जोड्ने महाकाली नदीमाथिको झोलुङ्गे पुलको एक भाग भत्किएको छ।महाकाली नदीको बाढीले पुलको बीच भागमा रहेको पिलर भत्काएपछि पुलको एक हिस्सा नदीमा खसेको हो।

प्रहरीका अनुसार भीमदत्त नगरपालिका–१३ तर्फबाट छैटौं र दोधारा चाँदनीतर्फबाट तेस्रो भागमा क्षति पुगेको छ।स्थानीयका अनुसार बिहान ४–५ बजेतिर पुलको एक भाग अस्वाभाविक रूपमा माथि उठेको देखिएको थियो। त्यसबारे प्रहरीलाई जानकारी गराइए पनि करिब ८ बजे उक्त भाग नदीमा खसेको हो।

२०६१ सालमा निर्माण भएको पुल भत्किएपछि दोधारा चाँदनी र भीमदत्तनगरबीचको आवागमन बन्द भएको छ। अब यात्रुले करिब दुई किलोमिटर माथि रहेको पक्की पुल प्रयोग गर्नुपर्नेछ।

सुदूरपश्चिम प्रदेशको यातायात पूर्वाधार निर्देशनालयले क्षतिको अध्ययनका लागि प्राविधिक टोली पठाउने तयारी गरेको जनाएको छ। प्राविधिक अध्ययनपछि मात्रै क्षतिको यकिन विवरण आउने निर्देशक जगतप्रसाद जोशीले बताएका छन्।