हिमालयन क्यापिटलले डाक्यो साधारणसभा, १५ प्रतिशत नगद लाभांश पारित गर्ने

काठमाडौं । हिमालयन क्यापिटल लिमिटेडले नवौं वार्षिक साधारणसभा आह्वान गरेको छ। कम्पनी सञ्चालक समितिको मंगलबार बसेको ८२औँ बैठकको निर्णयअनुसार साधारणसभा कात्तिक २० गते आयोजना हुने भएको हो।

सभा काठमाडौं महानगरपालिका–२८, कमलादीस्थित कम्पनीको रजिस्टर्ड कार्यालय आईटी प्लाजा, दोस्रो तल्लामा बिहान ११ बजे सुरु हुनेछ। सभामा सञ्चालक समितिको आर्थिक वर्ष २०८२/८३ को वार्षिक प्रतिवेदनमाथि छलफल गरी पारित गर्ने प्रस्ताव रहेको छ।

त्यस्तै, लेखापरीक्षकको प्रतिवेदनसहित २०८३ असार मसान्तसम्मको वासलात तथा २०८२ साउन १ गतेदेखि २०८३ असार मसान्तसम्मको नाफा–नोक्सान हिसाब, नाफा–नोक्सान बाँडफाँड हिसाब, नगद प्रवाह विवरणलगायतका वित्तीय विवरणमाथि छलफल गरी पारित गर्ने प्रस्ताव पनि सभामा पेस हुनेछ।

साधारणसभाको मुख्य एजेन्डामध्ये आर्थिक वर्ष २०८२/८३ को मुनाफाबाट सेयरधनीलाई करसहित १५ प्रतिशत नगद लाभांश वितरण गर्ने प्रस्ताव रहेको छ। सञ्चालक समितिले प्रस्ताव गरेबमोजिम उक्त लाभांश वितरणको प्रस्ताव सभाबाट स्वीकृत गरिनेछ।

यसैगरी, आर्थिक वर्ष २०८३/८४ का लागि लेखापरीक्षक नियुक्त गर्ने तथा पारिश्रमिक निर्धारण गर्ने प्रस्ताव पनि सभामा पेस हुनेछ।