सूर्यकुण्ड हाइड्रो ५ करोड घाटामा, विद्युत् बिक्री आम्दानीमा भारी गिरावट

काठमाण्डौ । सूर्यकुण्ड हाइड्रो इलेक्ट्रिक लिमिटेड चालु आर्थिक वर्ष २०८३/८४ को पहिलो त्रैमासमा ५ करोड ६ लाख ९१ हजार रुपैयाँ नोक्सानीमा गएको छ।

कम्पनीले सार्वजनिक गरेको अपरिष्कृत वित्तीय विवरणअनुसार गत आर्थिक वर्षको सोही अवधिमा कम्पनीले ७० लाख १३ हजार रुपैयाँ नाफा कमाएको थियो।

समीक्षा अवधिमा कम्पनीको विद्युत् बिक्रीबाट हुने आम्दानीमा भारी गिरावट आएको छ। कम्पनीले पहिलो त्रैमासमा १ करोड ३२ लाख ६९ हजार रुपैयाँ सञ्चालन आम्दानी गरेको छ। गत वर्षको सोही अवधिमा यस्तो आम्दानी ७ करोड ६ लाख ५५ हजार रुपैयाँ थियो।

कम्पनीको कुल नाफा पनि ५ करोड ५१ लाख ६५ हजार रुपैयाँबाट घटेर ७० लाख ४६ हजार रुपैयाँमा सीमित भएको छ।

समीक्षा अवधिमा कम्पनीको सञ्चालन नोक्सानी २ करोड ९ लाख रुपैयाँ पुगेको छ। गत वर्षको सोही अवधिमा कम्पनीले ३ करोड १८ लाख रुपैयाँ सञ्चालन नाफा कमाएको थियो।

कम्पनीको वित्तीय लागत २ करोड ९७ लाख ९२ हजार रुपैयाँ रहेको छ।

असोज मसान्तसम्म कम्पनीको कुल सम्पत्ति २५ करोड १६ लाख ७१ हजार रुपैयाँ रहेको छ। कम्पनीको चुक्तापुँजी ६८ करोड ९६ लाख ७४ हजार रुपैयाँ छ भने कुल इक्विटी ६८ करोड ६४ लाख ५६ हजार रुपैयाँमा झरेको छ।

कम्पनीको वार्षिकीकृत प्रतिसेयर आम्दानी ७.३५ रुपैयाँ ऋणात्मक रहेको छ। प्रतिसेयर नेटवर्थ ९९.५३ रुपैयाँ छ।

कम्पनीका अनुसार माथिल्लो तादी खोला जलविद्युत् आयोजनाबाट विद्युत् उत्पादन प्रसारण लाइनमा भएको क्षतिका कारण प्रभावित भएको छ। प्रसारण संरचना पुनर्निर्माणको काम जारी रहेको र पूर्ण क्षमतामा उत्पादन सुचारु हुन समय लाग्ने कम्पनीले जनाएको छ।