सामान्य वेवसाइट समेत नभएको विशाल बजारको सेयर भाउ दैनिक किन बढिरहेको छ ?

काठमाण्डौ । नेपाल सरकारको स्वामित्व रहेको विशाल बजार कम्पनी नेप्सेको कारोबार समूहमा सूचीकृत कम्पनी मध्यको एक सरकारी कम्पनी हो । पछिल्लो समय यो कम्पनीको सेयरमूल्यमा ह्वात्तै बढेको छ । कुनै विशेष कारण बिना नै यो कम्पनीको सेयरमूल्य पछिल्लो समय निकै बढिरहेको छ ।  

यसरी सेयरमूल्य बढ्नालाई न कम्पनीले लाभांश घोषणा गरेको छ न वित्तीय प्रतिवेदन नै सार्वजनिक गरेको छ । कम्पनीले वित्तीय अवस्था सार्वजनिक नगरेको पनि धेरै भईसकेको छ । कम्पनीको हाल आफ्नो वेवसाइट पनि छैन । सामान्यतयाःपब्लिकमा गएका कम्पनीको सर्वसाधारणलाई जानकारीको लागि आफ्नो वेवसाइट हुनै पर्ने हो । तर यो कम्पनीले वेवसाइट नै नराखेर कम्पनीको व्यवस्थापन तथा सञ्चालकमा  को छ ? वित्तिय अस्बस्था के कस्तो छ भन्ने विषयमा सर्वसाधारणलाई गुमराहमा राखेको छ । त्यतिमात्रै नभई यस कम्पनीले वर्षौदेखि वार्षिक साधारण सभा पनि आयोजना गर्न सकेको छैन ।  

पछिल्लोसमय यस कम्पनीको स्वामित्वमा रहेको जग्गा सेयर परिणत भएपछि यो कम्पनी नेप्सेमा सबै भन्दा उच्च पूँजी भएको  कम्पनी हुन पुगेको छ । यससँगै कम्पनीले उच्च पूँजीको मामिलामा नेपाल टेलिकम र नबिल बैंकलाई पछि पारेको छ । यो कम्पनीको बजार पूँजीकरण उच्च भएता पनि फ्लोटेड सेयर कम भएको कारण नै दोस्रो बजारमा उच्च मूल्य हुन पुगेको देखिन्छ । सर्वसाधारणतर्फ जम्मा १.०४ प्रतिशत अर्थात जम्मा ४ लाख १८ हजार ९६७ कित्ता सेयर मात्रै सेयर रहेको छ ।

यहि लो क्याप सेयर भएकै कारण यो कम्पनीको सेयर पछिल्लो समय तीन दिनदेखि दैनिक अपर सर्किट लागेको ब्रोकर हाउसमा भेटिएका लगानीकर्ताहरु बताउँछन् । बजारमा नै केही लगानीकर्ताहरुले यस कम्पनीको मूल्य समायोजन हुनु पर्ने तथा हाल सर्वसाधारणमा जम्मा १ प्रतिशत मात्रै सेयर भएको कारण थप सेयर अर्थात सर्वसाधारण तर्फको हिस्सा बढाउने गरि एफपीओ पनि ल्याउनु पर्ने तर्क गरेको पाइन्छ ।  

नेप्सेका प्रवक्ता मूराहरि पराजुलीले नेप्सेले युजर आईडी र पासवर्ड उपलब्ध गराएको तर कम्पनीे नै आफ्नो वेवसाइट बनाउन तथा सूचना राख्न आलटाल गरेको बताए । नेप्सेकै अर्का एक अधिकारीले सरकारी संस्था भएका कारण नै विशाल बजारले नेप्सेलाई नटेरेको बताए । ती अधिकारीले भने, ‘राष्ट्रिय बीमा कम्पनी र विशाल बजार कम्पनीले नेप्सेलाई मात्रै होइन मन्त्रीलाई समेत टेर्दैनन् ।’