हिमालयन रि इन्स्योरेन्सले कमायो ९८.९३ करोड खुद नाफा, बीमाशुल्क आर्जन १९% ले वृद्धि

काठमाण्डौ । हिमालयन रि इन्स्योरेन्स कम्पनी लिमिटेडले चालु आवको तेस्रो त्रैमाससम्म ९८ करोड ९३ लाख रुपैयाँ खुद नाफा आर्जन गरेको छ । यो रकम अघिल्लो आवको सोही अवधिको तुलनामा ६.२५ प्रतिशतले बढी हो । अघिल्लो आवको सोही अवधिसम्म कम्पनीले ९३ करोड ११ लाख रुपैयाँ खुद नाफा कमाएको थियो ।  

कम्पनीले यो अवधिसम्म ४ अर्ब १८ करोड रुपैयाँबराबरको खुद बीमाशुल्क आर्जन गरेको छ । यो रकम अघिल्लो आवको तुलनामा १९.७६ प्रतिशतले बढी हो । अघिल्लो आवमा ४ अर्ब २७ करोड रहेको कम्पनीको कुल आम्दानी बढेर ५ अर्ब २० करोड पुगेको छ ।  

यो अवधिमा कम्पनीको खर्च २४.७० प्रतिशतले बढेको छ । कम्पनीले समीक्षा अवधिसम्म ३ अर्ब ७१ करोड रुपैयाँबराबरको कुल खर्च गरेको छ । यस्तै कम्पनीले यो अवधिसम्म २ अर्ब २८ करोड रुपैयाँ खुद दाबी भुक्तानी गरेको छ ।  

तेस्रो त्रैमाससम्म कम्पनीको महावित्तपी कोषको आकार १६ करोड ४९ लाख रुपैयाँ रहेको छ । जुन अघिल्लो आवमा १० करोड ७० लाख थियो ।  

त्यस्तै कम्पनीको रिटेन्ड अर्निङको आकार ५१ करोड ९६ लाखबाट बढेर १ अर्ब २ करोड रुपैयाँ पुगेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस)१२.५३ रुपैयाँ, प्रतिसेयर नेटवर्थ १६१.२४ रुपैयाँ र पीई अनुपात ८०.७३ गुणा कायम भएको छ ।