‘द हिडन ट्रेजर मिस नेपाल २०२६’ को मुख्य प्रायोजकमा कजारिया

काठमाण्डौ । कजारिया रमेश टाइल्स लिमिटेडले नेपालको प्रतिष्ठित सौन्दर्य प्रतियोगिता ‘द हिडन ट्रेजर मिस नेपाल २०२६’ को मुख्य प्रायोजकको रूपमा आफ्नो आबद्धता घोषणा गरेको छ । यससम्बन्धी औपचारिक घोषणा २०८३ जेठ ७ गते ललितपुरस्थित द प्लाजामा आयोजित पत्रकार सम्मेलनमार्फत गरिएको हो ।

नेपालको टायल तथा डिजाइन उद्योगमा अग्रणी स्थान बनाएको कजारियाले मिस नेपाल २०२६ सँगको सहकार्यलाई केवल व्यावसायिक प्रायोजनभन्दा माथि उठेर प्रेरणा, आत्मविश्वास र आधुनिक नेपाली आकांक्षासँग जोडिएको अभियानका रूपमा प्रस्तुत गरेको छ । कम्पनीका अनुसार यो सहकार्यले नेपाली युवापुस्तालाई आफ्नो क्षमता पहिचान गर्न तथा सफलताको यात्रामा अग्रसर हुन प्रेरित गर्ने विश्वास लिइएको छ ।

पत्रकार सम्मेलनमा बोल्दै कजारियाका प्रवक्ताले मिस नेपाल प्रतियोगिताले आधुनिक नेपालको आत्मविश्वास, महत्वाकांक्षा र उत्कृष्टताको प्रतिनिधित्व गर्ने उल्लेख गर्दै यससँग सहकार्य गर्न पाउनु गौरवको विषय भएको बताए । 

उनले कजारियाले सदैव गुणस्तरीय उत्पादनसँगै समाजमा सकारात्मक प्रभाव पार्ने मञ्चहरूसँग सहकार्य गर्दै आएको र आगामी दिनमा पनि यस्ता अभियानलाई निरन्तरता दिने प्रतिबद्धता व्यक्त गरे ।

कम्पनीले मिस नेपाल २०२६ सँगको सहकार्यबाट आफ्नो ब्रान्डलाई आधुनिक जीवनशैली, भव्यता र विश्वसनीयताको प्रतीकका रूपमा थप स्थापित गर्ने लक्ष्य लिएको जनाएको छ । साथै, देशभरका उपभोक्तासँग भावनात्मक सम्बन्ध विस्तार गर्दै बजारमा आफ्नो उपस्थितिलाई अझ मजबुत बनाउने रणनीति पनि अघि सारेको छ ।

उन्नत प्रविधियुक्त उत्पादन प्रणालीमार्फत नेपालकै ठूलो टायल उत्पादन उद्योग सञ्चालन गरिरहेको कजारियाले हाल नेपालभर १०० भन्दा बढी शोरूममार्फत आफ्ना उत्पादन उपलब्ध गराउँदै आएको छ । कम्पनीका उत्पादनहरू टिकाउ, पानी तथा दाग प्रतिरोधी र आधुनिक डिजाइनयुक्त रहेको बताइएको छ ।

कजारियाले अन्तर्राष्ट्रिय स्तरका विभिन्न मान्यता तथा प्रमाणपत्र प्राप्त गरिसकेको छ । कम्पनीले गुणस्तर र दिगोपनाप्रतिको प्रतिबद्धतालाई निरन्तरता दिँदै विश्वस्तरीय उत्पादनमार्फत नेपाली बजारमा आफ्नो पहिचान अझ सुदृढ बनाउँदै लगेको जनाएको छ ।