बाढीपीडितको उद्धारमा बीमा क्षेत्रको साथ, चार कम्पनीद्वारा २ करोड ६१ लाख सहयोग

काठमाण्डौ । देशका विभिन्न क्षेत्रमा आएको विनाशकारी बाढीबाट प्रभावित नागरिकहरूको उद्धार, राहत तथा पुनःस्थापनाका लागि बीमा कम्पनीहरूले आर्थिक सहयोग जुटाउन थालेका छन् । विभिन्न चार बीमा कम्पनीले प्रधानमन्त्री दैवी प्रकोप उद्धार कोषमा गरी २ करोड ६१ लाख रुपैयाँ सहयोग घोषणा तथा हस्तान्तरण गरेका छन् ।

बाढीबाट प्रभावित नागरिकलाई राहत तथा पुनःस्थापनामा सहयोग पु¥याउने उद्देश्यले सूर्यज्योति लाइफ इन्स्योरेन्स कम्पनी लिमिटेडले प्रधानमन्त्री दैवी प्रकोप उद्धार कोषमा १ करोड रुपैयाँ सहयोग गरेको छ ।

कम्पनीका अध्यक्ष केशवप्रसाद भट्टराई, सञ्चालक हेमन्त नाहटा तथा प्रमुख कार्यकारी अधिकृत प्रकाश विक्रम खत्रीले संयुक्त रूपमा उक्त रकमको चेक अर्थमन्त्री स्वर्णिम वाग्लेलाई हस्तान्तरण गरेका हुन् । कम्पनीले बाढी आएको दोस्रो दिनमै सहयोग रकम उपलब्ध गराउने घोषणा गरेको थियो ।  

कम्पनीले बाढीबाट प्रभावित नागरिकहरूको उद्धार, राहत तथा पुनःस्थापनाका लागि नेपाल सरकार, सुरक्षा निकाय तथा विभिन्न संघसंस्थाबाट भइरहेको प्रयासप्रति ऐक्यबद्धता जनाउँदै सहयोग गरेको जनाएको छ ।

यसैगरी, सिद्धार्थ प्रिमियर इन्स्योरेन्स लिमिटेडले रसुवा जिल्लाको भोटेकोसी नदीमा आएको बाढीबाट भएको मानवीय तथा भौतिक क्षतिप्रति दुःख व्यक्त गर्दै प्रभावित समुदायको उद्धार, राहत तथा पुनःस्थापनाका लागि १ करोड १ लाख रुपैयाँ सहयोग गरेको छ ।

कम्पनीले संस्थागत सामाजिक उत्तरदायित्वअन्तर्गत प्रधानमन्त्री दैवी प्रकोप उद्धार कोषमा उक्त रकम सहयोग गरेको हो । कम्पनीका सञ्चालक हसना शर्माले उक्त रकम बराबरको चेक अर्थमन्त्री  वाग्लेलाई हस्तान्तरण गरेकी हुन् ।  

त्यस्तै, नेको इन्स्योरेन्स लिमिटेडले विपद्बाट प्रभावित नागरिकहरूको राहत तथा पुनःस्थापनामा सहयोग पुर्याउने उद्देश्यले उद्धार कोषमा ३५ लाख रुपैयाँ सहयोग गरेको छ ।

कम्पनीका तर्फबाट सञ्चालक समितिका सदस्य मणि देव भट्टराई तथा नायब प्रमुख कार्यकारी अधिकृत गणेश लम्सालले अर्थ मन्त्रालयमा आयोजित कार्यक्रममा अर्थमन्त्री वाग्लेलाई उक्त रकम बराबरको चेक हस्तान्तरण गरेका हुन् ।

उता, प्रभु इन्स्योरेन्स लिमिटेडले पनि रसुवाको भोटेकोसी क्षेत्रमा आएको विनाशकारी बाढीबाट प्रभावित नागरिकहरूको उद्धार, राहत तथा पुनःस्थापनाका लागि २५ लाख रुपैयाँ आर्थिक सहयोग प्रदान गरेको छ । कम्पनीका अनुसार भदौ १० गते आएको बाढीबाट प्रभावित परिवार तथा समुदायलाई सहयोग पु¥याउने उद्देश्यले उक्त रकम उपलब्ध गराइएको हो ।