५ महिनामा रु.६.६१ खर्बको वस्तु आयात, निर्यात कति ?

काठमाण्डौ । चालु आर्थिक वर्षको ५ महिनामा साढे ६ खर्ब रुपैयाँको वस्तु आयात भएको छ । भन्सार विभागले सार्वजनिक गरेको तथ्याङ्कअनुसार मंसिर महिनासम्ममा ६ खर्ब ६१ अर्ब ४८ करोड ८५ लाख रुपैयाँको वस्तु आयात भएको हो ।  

यो आयात गत आवको सोही अवधिसम्मको तुलनामा ३ प्रतिशत बढी हो । गत आवको ५ महिनासम्ममा ६ खर्ब ४१ अर्ब ६४ करोड रुपैयाँ बराबरको वस्तु आयात भएको थियो ।  

मंसिर महिनामा मात्रै १ खर्ब ४८ अर्ब रुपैयाँको वस्तु आयात भएको भन्सार विभागले जनाएको छ । कात्तिक महिनाको तुलनामा मंसिरमा वस्तु आयात २१।३१ प्रतिशतले बृद्धि भएको छ । कात्तिकमा १ खर्ब २२ अर्ब रुपैयाँको वस्तु आयात भएको थियो ।  

त्यस्तै, असोज महिनामा १ खर्ब २८ अर्ब, भदौ महिनामा १ खर्ब ३४ अर्ब रुपैयाँ र साउनमा १ खर्ब २८ अर्ब रुपैयाँ बराबरको वस्तु आयात भएको थियो ।  

भन्सार विभागका अनुसार मंसिर महिनासम्ममा ७३ अर्ब ६५ करोड ९७ लाख रुपैयाँ बराबरको वस्तु निर्यात भएको छ । यो गत आवको सोही अवधिसम्मको तुलनामा १६।५४ प्रतिशत बढी हो ।  

गत आवको सोही अवधिसम्ममा ६१ अर्ब ४७ करोड ८१ लाख रुपैयाँ बराबरको वस्तु निर्यात भएको थियो । मंसिर महिनामा मात्रै २१ अर्ब रुपैयाँको वस्तु निर्यात भएको भन्सार विभागले जनाएको छ ।