भारतीय पूर्वप्रधानमन्त्री मनमोहन सिंहको निधन

काठमाण्डौ । भारतका पूर्वप्रधानमन्त्री डा. मनमोहन सिंहको बिहीबार निधन भएको छ । उनको ९२ वर्षको उमेरमा निधन भएको हो । मनमोहन सिंहको स्वास्थ्य बिग्रिएपछि बिहीबार साँझ दिल्लीको अखिल भारतीय आयुर्विज्ञान संस्थान अर्थात एम्समा भर्ना गरिएको थियो ।

मनमोहन सिंह दुई पटक भारतको प्रधानमन्त्री भएका थिए । उनी २२ मे २००४ देखि देखि द्दट मे २०१४ सम्म भारतको प्रधानमन्त्रीको रुपमा रहेका थिए ।  

एम्सको मिडिया सेलले मनमोहन सिंहको निधन भएको जानकारी दिएको छ ।

उनलाई उमेर सम्बन्धी स्वास्थ्य समस्याका कारण २६ डिसेम्बरमा एम्स अस्पतलामा भर्ना गरिएको थियो। घरमै बेहोस भएपछि उनलाई एम्सको इमर्जेन्सीमा ल्याइएको थियो तर राति ९.५१ बजे उनको मृत्यु भएको थियो ।  

सिंह सन् १९९१–९६ सम्म भारतको अर्थमन्त्री समेत रहेका थिए । त्यतिबेला पीवी नरसिंह राव भारतको प्रधानमन्त्री थिए। नरसिंह रावलाई देशमा आर्थिक उदारीकरणका पिता मानिन्छ। मनमोहन सिंहले आफ्नो नीति कार्यान्वयनमा महत्वपूर्ण भूमिका खेलेका थिए ।

पूर्वप्रधानमन्त्री मनमोहन सिंहको निधनमा प्रधानमन्त्री नरेन्द्र मोदी, कांग्रेस नेता राहुल गान्धी, प्रियंका गान्धी, कांग्रेस अध्यक्ष मल्लिकार्जुन खर्गेलगायत ठूला नेताहरूले श्रद्धाञ्जली अर्पण गरेका छन्।