एलजीले भारु.१५ हजार करोडको आईपीओ जारी गर्न पायो अनुमति, भारतीय बजारको पाँचौ ठूलो हुने

काठमाण्डौ । दक्षिण कोरियाली कम्पनी ‘एलजी इलेक्ट्रोनिक्स’ले भारतीय सेयर बजारमा आईपीओ जारी गर्न अनुमति पाएको छ । भारतीय पूँजीबजार नियामक ‘सेक्युरिटी एण्ड एक्सचेञ्ज बोर्ड अफ इण्डिया(सेबी)ले एलजीलाई आईपीओ निष्कासनको अनुमति दिएको हो ।  

यो आईपीओको आकार १५ हजार करोड भारु हुनेछ । यो इस्यु अफर फर सेल हो । यसका माध्यमबाट भारु. १० फेयर भ्यालुको १०.१८ करोड इक्विटी सेयर बिक्री गरिनेछ । कम्पनीलाई आईपीओ बिक्रीबाट कुनैपनि आम्दानी नहुने भारतीय मिडियाले जनाएका छन् ।  

एलजीले आईपीओ निष्कासनको स्वीकृती प्रयोजनका लागि गत डिसेम्बर १९ मा सेबीमा ‘ड्राफ्ट रेड हेरिङ प्रोस्पेक्टस’ पेश गरेको थियो ।  

कम्पनीको यो आईपीओ भारतको पूँजीबजार इतिहासकै हालसम्मकै पाँचौं ठूलो हुनेछ । भारतको हालसम्मकै सबैभन्दा ठूलो आईपीओ भने हुन्डाई मोटरको हो । कम्पनीले २७ हजार ८६९ करोड भारुबराबरको आईपीओ जारी गरेको थियो ।  

१.८ बिलियन डलरको आईपीओ जारीपश्चात जब एलजीको सेयर सूचीकृत हुनेछ, कम्पनी बजार पूँजीकरण १३ बिलियन डलर हुने जनाइएको छ ।  

कम्पनीले यो आईपीओलाई बजार रणनीतिका रुपमा रुपमा लिएको छ । कम्पनीले सन् २०३० सम्म ७ हजार ५ सय करोड डलरबराबरको आम्दानी गर्ने लक्ष्य लिएको छ । यसलाई कम्पनीले उपभोक्ता विद्युतीय व्यापारलाई पुनः लयमा फर्काउने हिस्साको रुपमा लिएको छ ।