मन्त्रिपरिषद बैठक सकियो, 'गभर्नरको अजेण्डामा कुरै भएन'

काठमाण्डौ । आजको मन्त्रिपरिषद बैठकमा गभर्नरको विषयमा चर्चासम्म पनि नभएको एक मन्त्रीले जानकारी दिएका छन् ।  

मन्त्रिपरिषद बैठक केहीबेरअघि सकिएको छ । ती मन्त्रीका अनुसार बैठकमा गभर्नरको विषयमा कुनै छलफल नै भएन । 

बालुवाटारस्थित प्रधानमन्त्री निवासमा तीनघण्टा बढी चलेको बैठकमा नेपाल राष्ट् बैंकको गभर्नर नियुक्तिको प्रस्ताव नगएको र चर्चा समेत नभएको दाबी गरिएको छ ।  

आजको बैठकमा गभर्नर नियुक्तिको विषयमा कुनै अजेण्डा पेश नहुनु वा छलफल नै नहुनुले थप सशंय पैदा गरिदिएको छ ।  

आजको क्याबिनेटले केही मन्त्रालयबाट आएका विदेश भ्रमणका अजेण्डाहरु पारित गरेको छ। अन्य निर्णयहरु पनि सामान्य रहेका दाबी गरिएको छ । 

आज मन्त्रिपरिषद बैठकअघि प्रमुख सत्ता साझेदार दल नेकपा एमालेका अध्यक्ष तथा प्रधानमन्त्री केपी शर्मा ओली तथा कांग्रेस सभापति शेरबहादुर देउवासहितका नेताबीच छलफल भएको थियो । सो छलफलमा के भयो भन्ने विषय बाहिरिएको छैन ।  

प्रम ओलीले यसअघि कांगे्रस सभापति देउवालाई आज(बिहीबार)सम्म गभर्नर नियुक्त गरिसक्ने बचन दिएका थिए । तर त्यो पूरा भएन ।  

यहीकारण वर्तमान सत्ता गठबन्धन तलमाथि हुनेसम्मका आशंकाहरु भइरहेका छन् ।