सहकारीका बेथिति सुधार्न प्राधिकरणका अध्यक्षलाई मन्त्री अधिकारीको निर्देशन

ECONOMY& POLITICS
बुधबार, असार ३२,२०८२ 13:16:09

काठमाण्डौ । भूमिब्यवस्था, सहकारी तथा गरिबि निवारण मन्त्री बलराम अधिकारीले सहकारी क्षेत्रको नियमक निकाय राष्ट्रिय सहकारी नियमन प्राधिकरणका नवनियुक्त अध्यक्षलाई सहकारी क्षेत्रका बेथिति सुधार्ने गरी काम गर्न निर्देशन दिएका छन् । मङ्गलबार मन्त्रालयमा प्राधिकरणका नवनियुक्त अध्यक्ष डा.खगराज शर्मालाई सपथ गराउदै मन्त्री अधिकारीले सो कुरा बताएका हुन् ।

बिगत लामो समयदेखि सहकारी क्षेत्रका सरोकारवालाहरुले माग गर्दै आएको सहकारी क्षेत्रलाई नियमन गर्ने दोस्रो तहको नियमक निकाय(एसटीआई) गठन भएकाले सहकारी क्षेत्रमा हाल देखिएका समस्याहरु समाधान हुने मन्त्री अधिकारीको बिश्वास छ ।

मन्त्री अधिकारीले तीन तहकै सहकारीको नियमन, निर्देशन र निगरानी गर्ने काम प्राधिकरणको कार्यक्षेत्र भित्र रहेको उल्लेख गदैं समस्याग्रस्त सहकारीहरुको बचत फिर्तालाई पहिलो प्राथमिकतामा राखेर काम गर्न निर्देशन दिए ।

कर्जा असुली न्यायधिकरण, नियमन प्राधिकरण लगायतका हाल गठन भएका यस्ता संरचनाले सहकारीको मर्म र लक्षित उद्देश्य अनुसार काम गर्नुपर्ने मन्त्री अधिकारीको भनाई छ ।

मन्त्री अधिकारीले सपथ ग्रहण गराएसँगै नवनियुक्त अध्यक्ष डा. खगराज शर्माले आजैबाट कार्यभार सम्हालेका छन् । सपथ ग्रहण समारोहमा मन्त्रालयका सचिव केदारनाथ शर्मा, प्राधिकरणका सदस्यहरु, मन्त्रालयका सहसचिव लगायतको उपस्थिति रहेको थियो ।