जेनजी आन्दोलनका सहीद र घाइतेको नाममा जथाभावी रकम उठाउन थालियो, आधिकारिक खातामा मात्र जम्मा गर्न सरकारको अपील

काठमाण्डौ । सरकारले जेनजी आन्दोलनका क्रममा सहीद भएकाहरुको परिवारलाई राहात र घाइतेको उपचारका लागि भन्दै देशविदेशमा विभिन्न संघसंस्थाको नाममा रकम उठाउन प्रतिबन्ध लगाएको छ । 

अर्थ मन्त्रालयले शनिवार दिउँसो एक सूचना प्रकाशित गर्दै गैरसरकारी संघसंस्थाहरुले देश विदेशमा जेनजी आन्दोलनमा सहीद भएका परिवारलाई राहात र घाइतेको उपचारका लागि भन्दै जथाभावी पैसा उठाउने क्रम जारी रहेको जानकारी आएको भन्दै त्यसो नगर्न आग्रह गरेको हो ।  

'समानान्तर र अपारदर्शी ढंगले स्रोतको उपयोग हुन नदिन नेपाल सरकार कटिबद्ध रहेको छ ।' अर्थ मन्त्रालयले सूचनामा भनेको छः 'नेपाल सरकारले राहात, पुनर्निर्माण र आर्थिक पुनरुत्थानका लागि भौतिक पूर्वाधार निर्माण कोष स्थापना गरी सहयोग आह्वान गरेको व्यहोरो सर्वविदितै छ ।'

 अर्थले स्वदेश तथा विदेशमा यस प्रयोजनका लागि संकलित रकम दुरुपयोग हुनबाट रोक्न र पारदर्शी तथा जवाफदेही ढंगले परिचालन गर्न कोषको आधिकारिक खातामा मात्र रकम जम्मा गर्न आग्रह गरेको छ ।