आज ग्याल्पो ल्होसार पर्व मनाइँदै, सेयर बजार बन्द रहने

काठमाण्डौ । शेर्पा समुदायले आफ्नो नयाँ वर्षका रूपमा आज २१५३ औँ ग्याल्पो ल्होसार देशभर विविध कार्यक्रमसहित मनाउँदैछन्। यो पर्व फागुन शुक्ल प्रतिपदादेखि पूर्णिमासम्म मनाइन्छ ।

१२ वर्षे चक्रअनुसार मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र बराहका नाममा वर्ष वर्गीकरण गरिन्छ। प्रत्येक वर्ष फरक जनावरको प्रतीकसँगै नयाँ आशा र संकल्पका साथ पर्व मनाइने परम्परा छ।

यो पर्व भोटका नवौं राजा उदे गुङ्ग्यालको पालादेखि वसन्त पर्वका रूपमा सुरु भएको मानिन्छ।

यो पर्वको अवसरमा शेर्पा समुदायले आफ्नो गाउँघर र टोलका बाटोघाटो तथा पानीका मूलहरूको सरसफाइ गर्ने गर्छन्। नौ प्रकारको अन्न मिसाएर बनाइएको परिकार गुथुक र खाप्से खाने तथा आपसमा शुभकामना आदानप्रदान गर्दै नयाँ वर्षको स्वागत गर्ने परम्परा छ।

विगतमा हिमाली क्षेत्रका १२ जिल्लामा मनाइने ग्याल्पो ल्होसार हाल २२ जिल्लामा मनाइन्छ । शेर्पा जातिको बसाइसराइसँगै यो पर्व मनाउने जिल्ला बढेको हो ।

ग्याल्पो ल्होसारको अवसरमा सरकारले आज सार्वजनिक विदा पनि दिएको छ। आज देशका सम्पूर्ण सरकारी कार्यालय,सेयर बजार, बैंक वित्तीय संस्था र शैक्षिक संस्था लगायत बन्द रहने छन् । आज नेपाल स्कट एक्सचेञ्ज(नेप्से) पनि आज बन्द रहनेछ । यस कारण आज दोस्रो बजारमा सेयर कारोबार हुने छैन ।