सभामुख पदका लागि डोलप्रसाद अर्यालको उम्मेदवारी दर्ता

काठमाण्डौ । डोलप्रसाद अर्यालले प्रतिनिधि सभाको सभामुख पदका लागि शुक्रबार संसद् सचिवालयमा आफ्नो उम्मेदवारी दर्ता गराएका छन्। उनी राष्ट्रिय स्वतन्त्र पार्टी का उपसभापतिसमेत हुन्।

यसअघि बिहीबार बसेको रास्वपाको संसदीय दलको बैठकले पार्टी सभापति रवि लामिछानेको प्रस्तावमा अर्यालको नाम सर्वसम्मत रूपमा अनुमोदन गरेको थियो।

संसद् सचिवालयले सभामुख पदका लागि उम्मेदवारी दर्ता गर्न शुक्रबार बिहान ११ बजेदेखि दिउँसो २ बजेसम्मको समय निर्धारण गरेको थियो। निर्धारित समयावधि समाप्त भएपछि दिउँसो साढे २ बजे उम्मेदवारहरूको अन्तिम सूची प्रकाशन गर्ने कार्यतालिका रहेको छ।

सभामुख पदको निर्वाचन यही चैत २२ गतेका लागि तय गरिएको छ। उक्त दिन प्रतिनिधि सभाको बैठकमा सभामुख चयनका लागि प्रस्ताव पेश तथा समर्थन गरिनेछ।

हाल सभामुख पद रिक्त रहेकाले प्रतिनिधि सभाको बैठक ज्येष्ठ सदस्य अर्जुन नरसिंह केसीको अध्यक्षतामा सञ्चालन भइरहेको छ। सभामुख चयन नभएसम्म ज्येष्ठ सदस्यले बैठकको अध्यक्षता गर्ने संवैधानिक व्यवस्था छ।