सर्वसाधारणका लागि प्राइम कमर्सियल बैंकको संस्थापक सेयर बिक्रीमा

काठमाण्डौ । प्राइम कमर्सियल बैंकले संस्थापक समूहअन्तर्गतको सेयर बिक्रीमा राखेको छ। बैंकले आजदेखि उक्त सेयर बिक्री प्रक्रिया सुरु गरेको जनाएको छ।

बैंकका अनुसार बिक्रीमा राखिएको सेयर खरिदका लागि जो सुकै व्यक्ति तथा कम्पनीले आवेदन दिन सक्ने व्यवस्था गरिएको छ। इच्छुक सेयरधनीहरूले सूचना प्रकाशित भएको मितिले १५ दिनभित्र बैंकको कम्पनी सचिवको कार्यालयमा आवेदन पेश गर्नुपर्नेछ।

यसअघि ३५ दिने सूचना जारी गरी संस्थापक सेयरधनीहरुलाई बिक्रीमा राखिएकोमा कुनै आवेदन प्राप्त नभएकाले सर्वसाधारणका लागि उक्त सेयर बिक्री गर्न लागिएको बैंकले जनाएको छ ।  

बिक्री गर्ने संस्थापक सेयरधनीको नाम तथा सेयरको मूल्यसम्बन्धी विस्तृत जानकारी कम्पनी सचिवको कार्यालयमा सम्पर्क गरी प्राप्त गर्न सकिनेछ। यद्यपि, बैंकले हालसम्म बिक्रीमा राखिएको सेयरको कुल संख्या भने सार्वजनिक गरेको छैन।