धुन्चेमा भन्सार सिल तोडेर ल्याइँदै गरेको ४३६ थान भेप बरामद

काठमाण्डौं । धुन्चे क्षेत्रमा प्रहरीले नियमित सवारी चेकजाँचका क्रममा ठूलो मात्रामा अवैध विद्युतीय चुरोट (भेप) फेला पारेको छ ।  

पछिल्लो घटनाले जसले सीमा नाकाबाट हुने अवैध कारोबार फेरि सतहमा ल्याएको छ।

जिल्ला प्रहरी कार्यालय रसुवाका अनुसार भन्सारबाट सिल गरिएको ट्रक जाँच्ने क्रममा लुकाइछिपाइ ल्याइएको भेप बरामद गरिएको हो। 

प्रहरी निरीक्षक तथा प्रवक्ता राजु शाहका अनुसार वैशाख १८ गते गोसाईकुण्ड गाउँपालिका–६ धुन्चेस्थित अस्थायी प्रहरी पोष्टबाट खटिएको टोलीले नियमित जाँचका क्रममा उक्त सामग्री फेला पारेको हो।

ना ६ ख ८०२७ नम्बरको कन्टेनर ट्रक, रसुवा आमाछोदिङमो गाउँपालिका–५ का ३४ वर्षीय रन्द्रि श्रेष्ठले चलाइरहेका थिए।  

कपडामुनि र अगाडिको क्याबिनमा लुकाएर राखिएको ‘ईएलएफबीएआर–३०के पफ’ लेखिएको ४३६ थान भेप प्रहरीले बरामद गरेको जनाएको छ।

बरामद भेप र सवारीसाधनको अनुमानित मूल्य करिब ३५ लाख ९० हजार रुपैयाँ रहेको छ।  

घटनापछि बरामद सामग्री, गाडी र चालकलाई थप अनुसन्धान तथा कारबाहीका लागि वैशाख २० गते रसुवा भन्सार कार्यालय, टिमुरेमा बुझाइएको प्रहरीले जनाएको छ।