राजु अर्यालको अवकाशपछि सशस्त्रको कमाण्ड पौडेलको हातमा

काठमाण्डौं । सशस्त्र प्रहरी बल नेपालले नयाँ नेतृत्व पाएको छ, जहाँ नारायणदत्त पौडेलले औपचारिक रूपमा महानिरीक्षक (आईजीपी) को जिम्मेवारी सम्हालेका छन्।

गृह मन्त्रालयमा आयोजित समारोहमा गृहसचिव राजकुमार श्रेष्ठले उनलाई दर्ज्यानी चिह्न प्रदान गर्दै नेतृत्व हस्तान्तरण प्रक्रिया सम्पन्न गरेका हुन्।

मन्त्रिपरिषद्को गत सोमबारको निर्णयअनुसार अतिरिक्त महानिरीक्षक (एआईजी) रहेका पौडेललाई संगठनको सर्वोच्च पदमा बढुवा गरिएको थियो।  

 

उक्त निर्णयसँगै उनी अब सशस्त्र प्रहरी बलको कमाण्डमा पुगेका छन्।

यसअघि महानिरीक्षक रहेका राजु अर्याल उमेर हदका कारण १८ वैशाखमा अनिवार्य अवकाशमा गएपछि पद रिक्त भएको थियो। 

त्यसपछिको वरिष्ठता र रोलक्रमका आधारमा पौडेल नेतृत्वमा पुगेका हुन्।

नयाँ आईजीपीका रूपमा पौडेलसामु संगठनको व्यावसायिकता सुदृढ गर्ने, सीमा सुरक्षा र आन्तरिक सुरक्षाका चुनौती सामना गर्ने जस्ता जिम्मेवारी थपिएका छन्।