सहकारी ठगीमा कडाइ: १० संस्थाका ठूला ऋणीको नाम सार्वजनिक, को-को ?(सूचिसहित)

काठमाण्डौ । समस्याग्रस्त सहकारी व्यवस्थापन समितिले समस्याग्रस्त घोषित सहकारी संस्थाका ठूला ऋणीमाथि कडाइ सुरु गरेको छ । यसअन्तर्गत समितिले पहिलो चरणमा १० वटा समस्याग्रस्त सहकारी संस्थासँग सम्बन्धित ठूला ऋणीहरूको नाम सार्वजनिक गरेको हो ।

समितिले आगामी दिनमा अन्य समस्याग्रस्त सहकारीका ठूला ऋणीहरूको विवरण पनि क्रमशः सार्वजनिक गर्दै जाने जनाएको छ । सार्वजनिक सूचना जारी गर्दै समितिले सम्बन्धित ऋणीहरूलाई तत्काल कार्यालयमा सम्पर्क गरी बक्यौता ऋण चुक्ता गर्न आग्रह गरेको छ । तोकिएको समयभित्र ऋण नतिरे कानुनी प्रक्रिया अघि बढाइने चेतावनी समेत दिइएको छ ।

त्यस्तै, अन्य ऋणीहरूको नामावली पनि चरणबद्ध रूपमा सार्वजनिक गरिने भएकाले सबै ऋणीलाई यथाशीघ्र सम्पर्कमा आई दायित्व फर्छ्योट गर्न समितिले अनुरोध गरेको छ ।

आज सार्वजनिक गरिएका सहकारीहरूमा घेदुङ बहुउद्देश्यीय सहकारी, हाम्रो सगरमाथा बहुउद्देश्यीय सहकारी, तपाईँ हाम्रो बहुउद्देश्यीय सहकारी, नागरिक कल्याण बहुउद्देश्यीय सहकारी, आइडियल यमुना बहुउद्देश्यीय सहकारी, तुलसी बहुउद्देश्यीय सहकारी, नेपाल वित्तीय सहकारी, ओरियन्टल कोअपरेटिभ सहकारी, गौतम श्री सहकारी तथा नेपाल सहकारी वित्तीय संस्था रहेका छन् ।