सांसदहरूको जैविक विवरण संकलन थालियो, विद्युतीय हाजिरी तयारी

काठमाण्डौं । संघीय संसद्का सदस्यहरूको उपस्थितिलाई विद्युतीय रूपमा अभिलेख गर्न बायोमेट्रिक (जैविक) विवरण संकलन प्रक्रिया शुरु गरिएको छ।

प्रतिनिधिसभा र राष्ट्रियसभाका बैठकमा हाजिरीलाई डिजिटल प्रणालीमार्फत सुरक्षित र व्यवस्थित बनाउन संसद् सचिवालयले सांसदहरूलाई आवश्यक जैविक विवरण उपलब्ध गराउन आग्रह गरेको हो।

सचिवालयले बिहीबारदेखि यही २८ वैशाखसम्म सांसदहरूलाई सिंहदरबारस्थित विभिन्न समितिको कार्यालयमा उपस्थित भई बायोमेट्रिक विवरण बुझाउन अनुरोध गरेको छ।

संसद् सचिवालयका प्रवक्ता एकराम गिरिका अनुसार पहिले नयाँ बानेश्वरस्थित अन्तर्राष्ट्रिय सम्मेलन केन्द्रमा राखिएको विद्युतीय हाजिरी प्रणाली जेन–जी आन्दोलनका क्रममा क्षतिग्रस्त भएपछि पुनः नयाँ विवरण संकलन गर्नुपर्ने अवस्था आएको हो।

उनका अनुसार पहिलो चरणमा दुवै सदनका बैठकहरूको हाजिरीलाई विद्युतीय प्रणालीमार्फत अभिलेख गरिनेछ भने विस्तारै संसदीय समितिहरूमा पनि यही प्रणाली लागू गरिने योजना छ।

दुवै सदनको बैठक यही २८ वैशाख दिउँसो २ बजे बस्ने तय भएको छ।