काठमाडौँमा ‘नो हर्न’ अभियान, २०० भन्दा बढी सवारीचालक कारबाहीमा

काठमाण्डौं । काठमाडौँ उपत्यकामा बढ्दो ध्वनि प्रदूषण नियन्त्रण र ट्राफिक अनुशासन कायम गर्न ट्राफिक प्रहरीले सञ्चालन गरेको विशेष अभियानअन्तर्गत आज अनावश्यक रूपमा हर्न बजाउने २०० भन्दा बढी चालकलाई कारबाही गरिएको छ ।

काठमाडौँ उपत्यका ट्राफिक प्रहरी कार्यालयका अनुसार उपत्यकाका मुख्य सडक, व्यस्त चोक तथा अत्यधिक सवारी चाप हुने क्षेत्रमा विशेष निगरानी बढाएर जथाभावी हर्न प्रयोग गर्ने सवारीसाधनमाथि कारबाही गरिएको हो ।

कार्यालयका प्रवक्ता तथा प्रहरी उपरीक्षक नरेशराज सुवेदीले अभियानसँगै चालकहरूलाई ट्राफिक नियमको पालना, सुरक्षित सवारी सञ्चालन र ‘नो हर्न’ अभियानबारे सचेतनामूलक जानकारीसमेत दिइएको बताए ।

ट्राफिक प्रहरीका अनुसार विद्यालय, अस्पताल तथा संवेदनशील क्षेत्र आसपास अनावश्यक हर्नका कारण ध्वनि प्रदूषण बढ्दै गएको गुनासो आएपछि निगरानी थप कडा बनाइएको हो ।

काठमाडौँ उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक नवराज अधिकारीले ध्वनि प्रदूषण न्यूनीकरण र व्यवस्थित ट्राफिक व्यवस्थापनका लागि यस्तो अभियान आगामी दिनमा अझ प्रभावकारी रूपमा निरन्तर सञ्चालन गरिने जानकारी दिएका छन् ।