महभिरमा पहिरो खस्दा बेनी–जोमसोम सडक अवरुद्ध

काठमाण्डौं । म्याग्दीको अन्नपूर्ण गाउँपालिका–७ महभिरमा गएको पहिरोका कारण बेनी–जोमसोम–कोरला सडकखण्ड अवरुद्ध बनेको छ ।

शुक्रबार बिहान ढुंगा, माटो र लेदोसहितको पहिरो खस्दा मुस्ताङ जोड्ने मुख्य सडकमा सवारी आवागमन ठप्प भएको हो ।

सडक अवरुद्ध भएपछि बेनीबाट मुस्ताङतर्फ र जोमसोमतर्फबाट बेनी आउँदै गरेका दर्जनौँ सवारीसाधन बाटोमै रोकिएका छन् ।  

यातायात बन्द हुँदा स्थानीयवासी, पर्यटक तथा मुक्तिनाथ दर्शनका लागि गएका तीर्थयात्री प्रभावित बनेका छन् ।

जिल्ला प्रहरी कार्यालय म्याग्दीका सूचना अधिकारी सागर तिमिल्सिनाले पहिरो हटाएर सडक सञ्चालनमा ल्याउन प्रयास भइरहेको जानकारी दिए ।

उनका अनुसार सडक विभागका उपकरण प्रयोग गरी अवरुद्ध सडक खुलाउने काम तीव्र पारिएको छ ।

महभिर क्षेत्रमा सडकभन्दा माथिल्लो भागबाट निरन्तर पहिरो झर्ने समस्या रहेको छ ।  

सामान्य वर्षा हुँदा पनि लेदो र ढुंगासहित पहिरो खस्ने भएकाले सडक पटक–पटक अवरुद्ध हुने गरेको छ ।  

यसले यात्रु र सवारीसाधनलाई दुर्घटनाको उच्च जोखिममा पार्ने गरेको स्थानीयवासीले बताएका छन् ।