महालेखाले भन्यो, ‘व्यावसायिक विद्युत योजना सहित विद्युत खरिद सम्झौता गर्नुपर्छ’

काठमाण्डौ । महालेखापरीक्षकको कार्यालयले व्यावसायिक विद्युत योजना सहित विद्युत खरिद सम्झौता गर्न नेपाल विद्युत प्राधिकरणलाई सुझाव दिएको छ । कार्यालयले आज आफ्नो ६३ औंं वार्षिक प्रतिवेदन राष्ट्रपतिलाई बुझाउँदै यस्तो सुझाव पेश गरेको हो ।

कार्यालयले सुक्खा महिनाहरूमा आयातित विद्युतमा निर्भरता रहेको र रन अफ रिभर प्रकृतिका परियोजनाबाट उत्पादित विद्युत वर्षायाममा खेर गई प्राधिकरणलाई घाटा भइरहेकोले उक्त विषयलाई समेत ध्यान दिई व्यावसायिक विद्युत योजना सहित विद्युत खरिद सम्झौता गर्नुपर्ने उल्लेख गरेको छ ।

सार्वजनिक प्रतिवेदनअनुसार यो वर्षसम्म नेपाल विद्युत्त प्राधिकरणले २५३ स्वतन्त्र उर्जा उत्पादकसँग १६ हजार २७ मेगावाट खरिद सम्झौताको प्रक्रियामा रहेको छ । 

यस वर्षका लागि गरिएको योजना र वास्तविक विद्युत उत्पादनको तुलना गर्दा अधिकांश महिनामा योजना भन्दा उत्पादन कम भएको कारण प्राधिकरणलाई करिब रु.२६ करोड ८८ लाख किलोवाट घण्टा विद्युत उत्पादन घाटा भएको प्रतिवेदनमा जनाइएको छ।

उत्पादनमा कमी भएको कारण एक मित्रराष्ट्रबाट थप विद्युत आयात गर्दा प्राधिकरणलाई सोका लागि अनुमानित रु. १ अर्ब २२ करोड ७९ लाख व्ययभार परेको समेत उल्लेख छ ।