प्रतिनिधिसभा बैठक आज बिहान ११ बजे, विनियोजन विधेयकका सिद्धान्तमाथि संसद्मा बहस हुने

काठमाण्डौं । सङ्घीय संसद् अन्तर्गत प्रतिनिधिसभाको बैठक आज बिहान ११ बजे बस्ने भएको छ ।  

 

आगामी आर्थिक वर्ष २०८३/८४ को बजेट निर्माण प्रक्रियासँग सम्बन्धित महत्वपूर्ण विषयमा छलफललाई निरन्तरता दिन बैठक बोलाइएको संसद् सचिवालयले जनाएको छ ।

आजको बैठकमा आगामी आर्थिक वर्षको विनियोजन विधेयकका सिद्धान्त र प्राथमिकतामाथिको छलफललाई थप अघि बढाइने अपेक्षा गरिएको छ ।

सरकारको आर्थिक नीति, विकास प्राथमिकता, सार्वजनिक खर्च व्यवस्थापन तथा बजेटको समग्र दिशा तय गर्ने आधारका रूपमा हेरिएको यस छलफललाई संसद्को बजेट पूर्वतयारीको महत्वपूर्ण चरण मानिएको छ ।

यसअघि मंगलबार बसेको प्रतिनिधिसभा बैठकमा विनियोजन विधेयकका सिद्धान्त र प्राथमिकता (कर प्रस्तावबाहेक) माथि सांसदहरूले आ–आफ्ना धारणा राखेका थिए ।  

छलफलका क्रममा सांसदहरूले आर्थिक सुधार, उत्पादन वृद्धि, रोजगारी सिर्जना, विकास आयोजनाको प्रभावकारिता, राजस्व परिचालन तथा संघीयता कार्यान्वयनसँग सम्बन्धित विषय उठाएका थिए ।

सांसदहरूले उठाएका प्रश्न तथा जिज्ञासामाथि अर्थमन्त्री डा. स्वर्णिम वाग्लेले जवाफ दिएका थिए । 

उनले सरकार आर्थिक अनुशासन कायम गर्दै उत्पादनमुखी, रोजगारी केन्द्रित र निजी क्षेत्रमैत्री बजेट ल्याउने तयारीमा रहेको बताएका थिए ।  

साथै सीमित स्रोतसाधनका बीच विकास खर्चलाई प्राथमिकतामा राखेर बजेट निर्माण गरिने संकेत पनि दिएका थिए ।

विनियोजन विधेयकका सिद्धान्त र प्राथमिकतामाथिको छलफल सोमबारदेखि शुरु भएको हो ।  

अर्थमन्त्री डा. वाग्लेले वैशाख ३१ गते प्रतिनिधिसभामा उक्त प्रस्ताव पेश गरेका थिए ।  

प्रस्तावमार्फत सरकारले आगामी आर्थिक वर्षका लागि अपनाइने आर्थिक नीति, खर्च प्राथमिकता तथा विकास रणनीतिबारे प्रारम्भिक रूपरेखा संसद्समक्ष प्रस्तुत गरेको थियो ।

संसदीय अभ्यासअनुसार विनियोजन विधेयकका सिद्धान्त र प्राथमिकतामाथिको छलफललाई आगामी बजेटको आधार तय गर्ने प्रारम्भिक प्रक्रिया मानिन्छ ।

यही छलफलबाट प्राप्त सुझावका आधारमा सरकारले आगामी आर्थिक वर्षको पूर्ण बजेट तयारीलाई अन्तिम रूप दिनेछ ।