मदन भण्डारीका विचारलाई समयअनुकूल विकास गर्नुपर्छ : पूर्वराष्ट्रपति भण्डारी

काठमाण्डौं । पूर्वराष्ट्रपति विद्यादेवी भण्डारीले आजको युवा पुस्ताले परम्परागत ज्ञानमा मात्र सीमित नरही विश्वव्यापी प्रतिस्पर्धा, प्रविधि र नवप्रवर्तनसँग आफूलाई अनुकूल बनाउनुपर्ने आवश्यकता रहेको बताएकी छन् ।  

शनिबार आयोजित ‘मिडियामा मदन भण्डारी’ पुस्तक विमर्श तथा युवा बहस कार्यक्रमलाई सम्बोधन गर्दै उनले मदन भण्डारीका विचारहरू वर्तमान नेपाली राजनीतिमा अत्यावश्यक रहेको बताइन । 

उनले बदलिँदो विश्व परिवेशमा युवाले दक्षता, सिर्जनशीलता र नेतृत्व क्षमता विकास गर्नु अपरिहार्य बन्दै गएको  दावी गरिन ।  

नयाँ पुस्तालाई विज्ञान, सूचना प्रविधि, अनुसन्धान तथा आधुनिक सीपसँग जोडिन आग्रह गर्दै ज्ञान र प्रविधिको प्रभावकारी प्रयोगबाट मात्रै समाज रूपान्तरण र राष्ट्र निर्माणमा सार्थक योगदान दिन सकिने धारणा उनको थियो ।  

युवाले अवसर खोज्नेभन्दा अवसर सिर्जना गर्ने सोच विकास गर्नुपर्नेमा पनि उनले जोड दिइन ।  

पूर्वराष्ट्रपति भण्डारीले वैचारिक परिपक्वता, लोकतान्त्रिक संस्कार र आधुनिक प्रविधिको सन्तुलित प्रयोगले मात्रै मुलुकलाई समकालीन चुनौतीबाट बाहिर निकाल्न सकिने उल्लेख गरिन ।  

उनका अनुसार राजनीतिक चेतना, सामाजिक उत्तरदायित्व र प्राविधिक दक्षताको संयोजन आजको आवश्यकता बनेको छ ।

उनले युवा पुस्तालाई अध्ययन, अनुसन्धान, खुला बहस र रचनात्मक संवादमा सक्रिय सहभागिता जनाउन आग्रह गर्दै बदलिँदो समयको आवश्यकता बुझेर नवीन सोच, ज्ञान र क्षमतामार्फत मुलुकको विकास यात्रामा योगदान दिन आह्वान गरिन ।