लुम्बिनी प्रदेशसभाको बैठक बस्दै, विनियोजन विधेयकमाथि उठेका प्रश्नको मन्त्री कार्कीले जवाफ दिने

काठमाण्डौं । लुम्बिनी प्रदेशसभाको बजेट अधिवेशनअन्तर्गत आज बस्ने बैठकमा विनियोजन विधेयक, २०८३ का सिद्धान्त र प्राथमिकतामाथिको बहसलाई अघि बढाइने भएको छ ।  

प्रदेश सरकारको आगामी बजेटको दिशा र प्राथमिकतामाथि केन्द्रित छलफल आज पनि जारी रहनेछ ।

प्रदेशसभा सचिवालयले दिएको जानकारीअनुसार बैठक दिउँसो १ बजे बस्नेछ ।  

बैठकमा आर्थिक मामिला तथा योजनामन्त्री धनेन्द्र कार्की ले सांसदहरूले उठाएका प्रश्न र आलोचनामाथि सरकारको तर्फबाट जवाफ दिने कार्यक्रम रहेको छ ।

शनिबारको बैठकमा विनियोजन विधेयकका सिद्धान्त र प्राथमिकतामाथि भएको छलफलका क्रममा प्रतिपक्षी सांसदहरूले मात्रै होइन, केही सत्तापक्ष सांसदहरूले समेत सरकारको कार्यशैलीमाथि प्रश्न उठाएका थिए ।  

विशेषगरी नीति तथा कार्यक्रम सार्वजनिक नगरी बजेट प्रक्रिया अघि बढाइएको विषयलाई लिएर प्रदेशसभामा चर्को आलोचना भएको थियो ।

 

सांसदहरूले नीति तथा कार्यक्रम नै बजेटको आधार हुने भएकाले त्यसलाई अघि नसारी विनियोजन विधेयक ल्याउनु संसदीय अभ्यास, विधि र प्रक्रियाविपरीत भएको टिप्पणी गरेका थिए ।  

उनीहरूले प्रदेश सरकारले स्पष्ट योजना, विकासको प्राथमिकता र दीर्घकालीन दृष्टिकोणबिना बजेट निर्माण प्रक्रिया अघि बढाएको आरोपसमेत लगाएका छन् ।

आजको बैठकमा मन्त्री कार्कीले सांसदहरूको जिज्ञासा र आलोचनाको जवाफ दिने भएपछि प्रदेश सरकारको बजेट नीति, खर्च प्राथमिकता र आगामी आर्थिक वर्षको विकास रणनीतिबारे थप बहस हुने अपेक्षा गरिएको छ ।