तनहुँमा १२६ मेगावाटको तल्लो सेती जलविद्युत् आयोजना निर्माण हुने

काठमाण्डौ । तनहुँ जिल्लामा १२६ मेगावाट क्षमताको तल्लो सेती जलविद्युत् आयोजना निर्माण हुने भएको छ। आयोजना निर्माणका लागि एसियाली विकास बैंक ले २२७ मिलियन अमेरिकी डलर लगानी गर्ने भएको छ ।

यो आयोजना ३० प्रतिशत स्वपुँजी तथा ७० प्रतिशत ऋण लगानी संरचनामा निर्माण गरिनेछ। अर्धजलाशययुक्त प्रकृतिको यस आयोजनाको बाँध तनहुँको बन्दीपुर गाउँपालिका–६ र देवघाट गाउँपालिका–३ क्षेत्रमा रहनेछ।

यस्तै, विद्युत्गृह, मुख्य सुरुङ तथा कर्मचारी आवास देवघाट गाउँपालिका–३ र ४ मा निर्माण गरिने जनाइएको छ। आयोजना कार्यान्वयनका लागि आवश्यक पूर्वतयारीसमेत सुरु भइसकेको छ।

विद्युगृह तथा कर्मचारी आवास निर्माणका लागि आवश्यक करिब १४६ रोपनी जग्गा अधिग्रहण प्रक्रिया अघि बढाइएको समेत जनाइएको छ ।