देउवा दम्पतीविरुद्ध रेड नोटिस जारी गर्न इन्टरपोलको दोस्रो पटक पनि इन्कार

काठमाण्डौं । कांग्रेसका पूर्वसभापति शेरबहादुर देउवा र उनकी पत्नी आरजु राणा विरुद्ध रेड नोटिस जारी गर्न नेपालले गरेको आग्रहलाई इन्टरपोलले दोस्रो पटक पनि अस्वीकार गरेको छ ।

सम्पत्ति शुद्धीकरणसम्बन्धी अनुसन्धानमा रहेका देउवा दम्पतीविरुद्ध रेड नोटिस जारी गर्न आवश्यक कागजात र कानूनी आधार पर्याप्त नभएको भन्दै इन्टरपोलले थप स्पष्ट विवरण मागेको हो । 

नेपाल प्रहरीले दोस्रो पटक थप कागजातसहित अनुरोध पठाए पनि इन्टरपोलले अझै पर्याप्त आधार नपुगेको जवाफ दिएको स्रोतले जनाएको छ ।

सम्पत्ति शुद्धीकरण अनुसन्धान विभागले २४ चैतमा जिल्ला अदालत काठमाडौंबाट देउवा दम्पतीविरुद्ध पक्राउ पुर्जी लिएको थियो ।  

त्यसपछि उनीहरूलाई विदेशबाट पक्राउ गरेर नेपाल ल्याउने उद्देश्यले नेपाल प्रहरीले इन्टरपोलमार्फत रेड नोटिस जारी गर्न अनुरोध गरेको थियो ।

तर, इन्टरपोलले अनुसन्धानमा ‘सम्बद्ध कसुर’ स्पष्ट नभएको, कुन गैरकानूनी स्रोतबाट सम्पत्ति आर्जन भएको हो भन्ने पर्याप्त आधार नदेखिएको भन्दै प्रश्न उठाएको बताइएको छ ।

देउवा दम्पती हाल विदेशमै रहेको बताइएको छ । उनीहरूविरुद्धको अनुसन्धान, कानुनी प्रक्रिया र रेड नोटिस विवाद अहिले राजनीतिक तथा कानूनी बहसको विषय बनेको छ ।