इलामका किसान संकटमा : चिया र दूधको पैसा अड्कियो, डीडीसी दिएन ५० करोड

काठमाण्डौं । इलामका चिया र दुग्धजन्य उद्योग बजार अभाव र भुक्तानी संकटको दोहोरो मारमा परेका छन् ।  

उत्पादन बढे पनि उचित बजार व्यवस्थापन नहुँदा किसान र उद्योगी आर्थिक समस्यामा फस्दै गएको गुनासो उठेको हो ।

प्रतिनिधिसभाको आजको बैठकमा सांसद निश्कल राईले संसदमा बोल्दै इलामका चिया, छुर्पी र दुग्धजन्य उद्योगहरू सरकारको उपेक्षाका कारण संकटतर्फ धकेलिएको बताएका छन् ।

उनका अनुसार जिल्लामा १५ भन्दा बढी चिया उद्योग, १५० भन्दा बढी छुर्पी उद्योग तथा सयौँ दुग्धजन्य मिठाई उद्योग सञ्चालनमा भएपनि उत्पादनले अपेक्षित मूल्य र बजार पाउन सकेको छैन ।

उनले विशेषगरी दुग्ध क्षेत्र गम्भीर संकटमा पुगेको उल्लेख गर्दै दुग्ध विकास संस्थान (डीडीसी) ले किसानलाई लामो समयदेखि भुक्तानी नदिएको आरोप लगाए ।  

उनका अनुसार किसानले करिब साढे तीन महिनादेखि दूध बिक्रीबापतको रकम पाएका छैनन् भने करिब ५० करोड रुपैयाँ भुक्तानी अझै रोकिएको छ ।

भुक्तानी रोकिँदा किसानहरू ऋण तिर्न, पशु आहार किन्न र दैनिक घरखर्च चलाउनसमेत कठिनाइमा परेको राईको भनाइ छ ।  

उनले उत्पादन बढाउन प्रोत्साहन गर्ने नीति कमजोर हुँदा किसानहरू निराश बन्दै गएको बताए ।

इलामको ग्रामीण अर्थतन्त्रमा चिया र दुग्धजन्य क्षेत्र मुख्य आधार मानिए पनि बजार असन्तुलन, कमजोर प्रवर्द्धन र भुक्तानी ढिलाइले उद्योग र कृषिक्षेत्र दुवै प्रभावित हुन थालेको विश्लेषण गरिएको छ ।  

उनले सरकारसँग तत्काल बक्यौता भुक्तानी र दीर्घकालीन बजार व्यवस्थापनको माग गरेका छन् ।