नेपाल–स्विस सहकार्यको ७ दशक: पुलले फेरिएको नेपालको कथा फोटोबुकमा

काठमाण्डौ । नेपाल र स्विट्जरल्याण्डबीचको ७० वर्ष लामो कूटनीतिक सम्बन्धको अवसरमा प्रकाशित स्मरणीय फोटोबुक ‘ब्रिजिङ नेसन्स- ७० इयर्स अफ स्विस–नेपाल फ्रेन्डसिप’ सार्वजनिक गरिएको छ । नेपाल–स्विट्जरल्याण्ड सहकार्यको ऐतिहासिक यात्रा, विशेषगरी नेपालको झोलुङ्गे पुल कार्यक्रमको उपलब्धिलाई केन्द्रमा राखेर तयार गरिएको उक्त फोटोबुक बुधबार काठमाडौंमा आयोजित विशेष समारोहबीच सार्वजनिक गरिएको हो ।

कार्यक्रममा नेपालका पूर्व अर्थमन्त्री Rameshore Prasad Khanal प्रमुख अतिथिका रूपमा सहभागी थिए भने स्विट्जरल्याण्डको संघीय विदेश मामिला विभाग अन्तर्गत एशिया तथा प्रशान्त डिभिजनका प्रमुख Markus Leitner समेत कार्यक्रममा उपस्थित थिए ।

सन् १९५६ देखि सुरु भएको नेपाल–स्विट्जरल्याण्ड सहकार्यलाई विश्वकै सफल विकास साझेदारीमध्ये एक मानिन्छ । त्यसैको प्रतीकका रूपमा रहेको नेपालको झोलुङ्गे पुल कार्यक्रमले विगत ६ दशकमा देशभरको दुर्गम भेगमा यातायात र पहुँच विस्तारमा महत्वपूर्ण योगदान दिएको उल्लेख गरिएको छ । प्रारम्भिक चरणमा जम्मा २९ वटा पुलबाट सुरु भएको कार्यक्रमले सन् २०२३ सम्म आइपुग्दा १० हजारभन्दा बढी झोलुङ्गे पुल निर्माण गरिसकेको जनाइएको छ ।

फोटोबुकमा नेपालको भौगोलिक विकटतालाई चिर्दै निर्माण गरिएका झोलुङ्गे पुलहरूले शिक्षा, स्वास्थ्य, बजार र आधारभूत सेवासम्मको पहुँच कसरी विस्तार गरे भन्ने विषयलाई तस्वीर र ऐतिहासिक सामग्रीमार्फत प्रस्तुत गरिएको छ । यसले समुदायमा आधारित दिगो विकास मोडेलको रूपमा नेपालले हासिल गरेको सफलतालाई समेत उजागर गरेको उल्लेख छ ।

नेपालका लागि स्विस राजदूत Danielle Meuwly ले कार्यक्रममा बोल्दै झोलुङ्गे पुलको सफलता केवल पूर्वाधार निर्माणमा सीमित नभई लाखौं नेपालीको जीवन परिवर्तनसँग जोडिएको बताइन् । उनले यो उपलब्धि ‘नेपालका लागि नभई नेपालसँगको सहकार्यमा’ सम्भव भएको उल्लेख गर्दै सरकार, स्थानीय समुदाय र नेपाली इन्जिनियरहरूको योगदानको प्रशंसा गरिन् ।

त्यस्तै, Markus Leitner ले नेपाल–स्विट्जरल्याण्ड सहकार्यले भौगोलिक दूरी मात्र नभई दुई देशका जनता र सम्बन्धलाई समेत जोडेको बताए । उनले नेपालको झोलुङ्गे पुल कार्यक्रमलाई अन्तर्राष्ट्रिय सहकार्यको सफल नमूनाका रूपमा व्याख्या गर्दै यसले लाखौं मानिसलाई बजार, शिक्षा र स्वास्थ्य सेवासँग जोड्न योगदान पुर्‍याएको धारणा राखे ।

आयोजकका अनुसार ‘ब्रिजिङ नेसन्स– ७० इयर्स अफ स्विस–नेपाल फ्रेन्डसिप’ फोटोबुकले विगतका साझा उपलब्धिको दस्तावेजीकरण मात्र नगरी भविष्यमा पनि दिगो विकास र अन्तर्राष्ट्रिय सहकार्यलाई प्रेरित गर्ने अपेक्षा गरिएको छ ।