कैलाली टेम्पो प्रकरणमा दुई वन कर्मचारीविरुद्ध मुद्दा दर्ता

काठमाण्डौ । कैलालीमा एक महिलाको टेम्पो भिरबाट खसालिएको घटनामा प्रहरीले वरिष्ठ वन अधिकृत कृष्णबहादुर बोहरा र जमदार चेतराज फूलाराविरुद्ध शान्तिविरुद्धको कसुरमा मुद्दा दर्ता गरेको छ।  

पक्राउ परेका १२ वन कर्मचारीमध्ये यी दुई जनामाथि मात्र मुद्दा चलाइएको छ भने बाँकी १० जना रिहा भएका छन्।

घटना छानबिनका लागि सुदूरपश्चिम प्रदेश सरकारले पाँच सदस्यीय समिति गठन गरेको छ, जसलाई सात दिनभित्र प्रतिवेदन बुझाउन निर्देशन दिइएको छ।

घटना गत शुक्रबार कैलालीको गोदावरी नगरपालिका–४ बासपानीमा भएको थियो।  

स्थानीय धनादेवी धामीले सडक किनारमा टेम्पोमा सामान बेच्दै आएकी थिइन्।  

वन क्षेत्र अतिक्रमण गरी व्यापार गरेको भन्दै वन कर्मचारीहरूले टेम्पो हटाउने क्रममा भिरबाट खसालेका थिए, जसको व्यापक आलोचना भएको थियो।

वन कार्यालयका कर्मचारीहरूले भने टेम्पो जानाजान खसालिएको नभई अतिक्रमण हटाउने क्रममा भिरालो भूभाग र असन्तुलनका कारण दुर्घटनावश खसेको दाबी गरेका छन्।