प्रतिनिधिसभामा बजेट बहस जारी, मन्त्रीहरूले दिँदैछन् सांसदका प्रश्नको जवाफ

काठमाण्डौ । संघीय संसद्अन्तर्गत प्रतिनिधिसभाको बैठक आज पनि जारी रहेको छ।  

चालू बजेट अधिवेशन अन्तर्गत सरकारद्वारा प्रस्तुत विनियोजन विधेयक, २०८३ माथिको छलफललाई निरन्तरता दिँदै बैठकमा विभिन्न मन्त्रालयसँग सम्बन्धित बजेट शीर्षकमाथि सांसदहरूले उठाएका प्रश्नहरूको सम्बन्धित मन्त्रीहरूले जवाफ दिने कार्यसूची तय गरिएको छ।

संसद् सचिवालयका अनुसार आजको बैठकको मुख्य कार्यसूची विनियोजन विधेयक, २०८३ अन्तर्गत विभिन्न मन्त्रालयका बजेट तथा कार्यक्रममाथि सांसदहरूले व्यक्त गरेका जिज्ञासा, टिप्पणी, सुझाव तथा प्रश्नहरूको जवाफ सम्बन्धित मन्त्रीहरूबाट प्राप्त गर्नु रहेको छ।

बैठकमा युवा, श्रम तथा रोजगार मन्त्रालयअन्तर्गत विनियोजित बजेट, रोजगारी सिर्जना, वैदेशिक रोजगार व्यवस्थापन, श्रमिक सुरक्षा तथा युवामुखी कार्यक्रमका विषयमा उठेका प्रश्नहरूको जवाफ सम्बन्धित मन्त्रीले दिनेछन्।

त्यस्तै उद्योग, वाणिज्य तथा आपूर्ति मन्त्रालयसँग सम्बन्धित औद्योगिक विकास, व्यापार प्रवर्द्धन, आपूर्ति व्यवस्थापन तथा लगानी वातावरण सुधारका विषयमा सांसदहरूले उठाएका चासोबारे पनि जवाफ प्रस्तुत गरिनेछ।

यसैगरी कृषि, वन तथा वातावरण मन्त्रालयअन्तर्गत कृषि उत्पादन वृद्धि, किसान सहायता कार्यक्रम, वन संरक्षण, जैविक विविधता तथा वातावरणीय व्यवस्थापनसँग सम्बन्धित विषयमा उठेका प्रश्नहरूको जवाफ मन्त्रीले दिने कार्यसूची रहेको छ।

सूचना तथा सञ्चार मन्त्रालयका कार्यक्रम, सञ्चार क्षेत्रको विकास, डिजिटल पूर्वाधार विस्तार तथा सूचना प्रविधि क्षेत्रका योजनाबारे उठेका प्रश्नको समेत जवाफ दिइनेछ।

संस्कृति, पर्यटन तथा नागरिक उड्डयन मन्त्रालयअन्तर्गत पर्यटन प्रवर्द्धन, सांस्कृतिक सम्पदाको संरक्षण, हवाई सेवा विस्तार तथा नागरिक उड्डयन क्षेत्रका योजनाबारे सांसदहरूले उठाएका विषयमा सम्बन्धित मन्त्रीले संसद्मा स्पष्टिकरण दिनेछन्।

त्यसैगरी स्वास्थ्य तथा खाद्य स्वच्छता मन्त्रालयसँग सम्बन्धित स्वास्थ्य सेवा विस्तार, अस्पताल व्यवस्थापन, औषधि उपलब्धता तथा खाद्य सुरक्षासम्बन्धी विषयमा उठेका प्रश्नहरूको पनि जवाफ प्रस्तुत गरिनेछ।  

भूमि व्यवस्था, सहकारी तथा सङ्घीय मामिला र सामान्य प्रशासन मन्त्रालयअन्तर्गत भूमि व्यवस्थापन, सहकारी क्षेत्रको नियमन, सार्वजनिक सेवा प्रवाह तथा प्रशासनिक सुधारसँग सम्बन्धित विषयमा सांसदहरूले राखेका जिज्ञासाको जवाफ सम्बन्धित मन्त्रीले दिनेछन्।

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयअन्तर्गत महिला सशक्तीकरण, बालअधिकार संरक्षण, लैङ्गिक समानता तथा सामाजिक सुरक्षा कार्यक्रमका विषयमा उठेका प्रश्नमाथि पनि सम्बन्धित मन्त्रीबाट जवाफ र स्पष्टीकरण प्रस्तुत गरिने कार्यसूची रहेको छ।

विनियोजन विधेयकमाथिको छलफल संसद्को बजेट प्रक्रियाको महत्वपूर्ण चरण मानिन्छ।

यस क्रममा सांसदहरूले मन्त्रालयगत बजेट, कार्यक्रम तथा कार्यान्वयन पक्षबारे सरकारसँग जवाफदेहिता खोज्ने र सरकारले आफ्ना नीति तथा कार्यक्रमको औचित्य पुष्टि गर्ने अवसर प्राप्त गर्दछ।  

बजेट पारित हुनुअघि मन्त्रालयगत खर्चका शीर्षकमाथि हुने यस्तो छलफललाई संसदीय निगरानीको महत्वपूर्ण अभ्यासका रूपमा लिइन्छ।