तीन संसदीय समितिको बैठक आज बस्दै

काठमाण्डौ । संघीय संसद्अन्तर्गत आज तीनवटा संसदीय समितिको बैठक बस्दै छन्। बैठकहरूमा पर्यटन क्षेत्रका कानूनी व्यवस्था, कारागारमा रहेका कैदीबन्दी तथा थुनुवाको मानवअधिकार अवस्था र सडक निर्माणमा देखिएको ढिलाइलगायतका विषयमा छलफल हुने कार्यसूची रहेको छ।

अन्तर्राष्ट्रिय सम्बन्ध र पर्यटन समितिको बैठक बिहान १०ः३० बजे बस्नेछ। बैठकमा ‘पर्यटन विधेयक, २०८१’ सम्बन्धमा विषय विज्ञहरूसँग छलफल गरी विधेयकका विभिन्न पक्षबारे सुझाव संकलन गरिनेछ।

त्यसैगरी, कानून, न्याय तथा मानवअधिकार समितिको बैठक बिहान १०ः०० बजे बस्नेछ। बैठकमा विभिन्न कारागार तथा हिरासतमा रहेका थुनुवा र कैदीबन्दीको मानवअधिकार अवस्थासम्बन्धी अध्ययन गर्न गठित उपसमितिले तयार पारेको प्रतिवेदनमाथि छलफल गरिने कार्यसूची रहेको छ।

यस्तै, बिहान १०ः०० बजे बस्ने पूर्वाधार विकास समितिको बैठकमा विद्युत् वितरण लाइन तथा पोल समयमै व्यवस्थापन हुन नसक्दा सडक निर्माण आयोजनामा भइरहेको ढिलाइबारे सम्बन्धित निकायसँग छलफल गरिनेछ।