नेप्सेको सीईओका लागि ८ जनाको आवेदन, १०–१५ दिनभित्र सर्टलिस्ट तयार हुने

काठमाण्डौ । नेपाल स्टक एक्सचेन्ज (नेप्से)का प्रमुख कार्यकारी अधिकृत (सीईओ) पदका लागि आठ जनाले आवेदन दिएका छन् ।  

अर्थ मन्त्रालयका सहसचिव तथा प्रवक्ता अमृत लम्सालका अनुुसार आवेदन दिने अन्तिम समयसम्म आठ जनाको आवेदन परेको हो ।  

उनका अनुसार सीईओ छनोटका लागि गठित सिफारिस समितिले आवेदकहरूले पेश गरेको व्यावसायिक कार्ययोजना (बिजनेस प्लान) को मूल्याङ्कन प्रक्रिया अघि बढाउनेछ ।

‘बिजनेश प्लानको मूल्यांकन सकिनासाथ ८ जनाबाट सर्टलिस्ट तयार गर्नेछौं’ उनले भने, ‘नेप्सेका लागि अब योग्य सीइओ नै छानिनेछ, सम्भवतः १०–१५ दिनभित्र सर्टलिस्ट तयार भइसक्नेछ ।’

सर्टलिस्टमा परेका उम्मेदवारहरूले आफ्नो व्यावसायिक कार्ययोजना प्रस्तुत गर्नुपर्नेछ । त्यसपछि उनीहरू अन्तर्वार्तामा सहभागी हुनेछन् । प्रस्तुतीकरण र अन्तर्वार्तासहितको छनोट प्रक्रिया पूरा भएपछि नेप्सेले नयाँ सीईओ पाउने लम्सालले जानकारी दिए ।

यसअघि सिफारिस समितिले सीईओ पदका लागि साउन १२ गतेदेखि २६ गतेसम्म आवेदन आह्वान गरेको थियो ।