ठूलो परिमाणमा भन्सार छली ल्याइएका सामान प्रहरी नियन्त्रणमा

NEWS
मंगलवार, भाद्र २,२०८३ 16:59:41

काठमाण्डौ । नवलपरासी (बर्दघाट सुस्ता पूर्व)मा प्रहरीले ठूलो परिमाणमा भन्सार छली गरी ल्याइएका कपडा तथा अन्य सामान बरामद गरेको छ।

पूर्व–पश्चिम राजमार्ग हुँदै बिलबिजकबिना भन्सार छली तथा चोरी–निकासी गरी अवैध सामान ओसारपसार भइरहेको सूचनाका आधारमा प्रहरीले भदौ १ गते राति करिब १२ः३० बजे कावासोती नगरपालिका–८ स्थित फलफूल चोकमा सवारीसाधन जाँच गरेको थियो।

जाँचका क्रममा पश्चिमबाट पूर्व, नारायणगढतर्फ जाँदै गरेको ना.३ ख ४६७२ नम्बरको ट्रकभित्र लुकाइछिपाइ राखिएको बिलबिजक नभएका विभिन्न सामान फेला परेपछि प्रहरीले नियन्त्रणमा लिएको हो।

प्रहरीका अनुसार ट्रकबाट विभिन्न रङका २ हजार १६० थान कुर्था–सुरुवाल, १ हजार ५०० थान काँचो कपडा तथा अन्य गरी ठूलो परिमाणमा कपडा बरामद गरिएको छ।

बरामद सामानको प्रारम्भिक विवरणअनुसार विभिन्न रङका कुर्था–सुरुवालको मूल्य २१ लाख ६० हजार रुपैयाँ, काँचो कपडाको एक समूहको मूल्य ४ लाख ५० हजार रुपैयाँ, ६ हजार ८७५ मिटर काँचो कपडाको मूल्य १७ लाख १८ हजार ७५० रुपैयाँ तथा अर्को ७ हजार ६८७ मिटर काँचो कपडाको मूल्य १९ लाख २१ हजार ७५० रुपैयाँ रहेको प्रहरीले जनाएको छ।

यसरी बरामद सामानको कुल मूल्य ६२ लाख ५० हजार ५०० रुपैयाँ रहेको जिल्ला प्रहरी कार्यालय, नवलपरासी (बर्दघाट सुस्ता पूर्व)ले जनाएको छ।

प्रहरीले बरामद सामानसहित ट्रक र ट्रक चालकलाई आवश्यक अनुसन्धान तथा कारबाहीका लागि महेशपुर भन्सार कार्यालय, नवलपरासी (बर्दघाट सुस्ता पश्चिम) पठाएको छ।