.gif)
.png)
काठमाण्डौ । कर्णाली प्रदेशमा मन्त्री चयनको विषय टुंगो लाग्न नसक्दा सोमबारका लागि तय गरिएको मन्त्रीहरूको शपथ कार्यक्रम अन्तिम समयमा स्थगित भएको छ ।
प्रदेश सरकारले सोमबार बिहान ११ बजे मन्त्रीहरूको शपथ गराउने तयारी गरेको थियो । त्यसका लागि मुख्यमन्त्री मंगलबहादुर शाहीले प्रदेश प्रमुखको कार्यालयसँग समयसमेत मागेका थिए । प्रदेश प्रमुखको कार्यालयले ११ बजेको समय दिए पनि मन्त्री बन्नेहरूको नाममा सहमति जुट्न नसकेपछि मुख्यमन्त्रीले सिफारिस पठाउन सकेनन् ।
मन्त्रीको नाम टुंग्याउन नसकेपछि मुख्यमन्त्री शाही स्वयं प्रदेश प्रमुख यज्ञराज जोशीलाई भेट्न पुगेका थिए । भेटमा उनले दलभित्र मन्त्री छनोटमा सहमति बन्न नसकेको भन्दै तत्कालका लागि शपथ कार्यक्रम स्थगित गरिदिन आग्रह गरेको बताइएको छ ।
प्रदेश प्रमुखको कार्यालय स्रोतका अनुसार मुख्यमन्त्रीले दलभित्र कुरा नमिलेको जानकारी गराउँदै केही दिनका लागि कार्यक्रम सार्न आग्रह गरेका थिए । नयाँ शपथ कार्यक्रम भदौ ११ गतेसम्म हुनसक्ने गरी छलफल भएको स्रोतको भनाइ छ ।
मन्त्रीका लागि यसअघि विन्दमान विष्ट, जुम्कित लामा र मिलन खड्काको नाम चर्चामा थियो । तर साबिक समाजवादी धारले ती नाममा सहमति नजनाएपछि मन्त्री चयन थप पेचिलो बनेको हो ।
समाजवादी धारले कल्याणी खड्कालाई मन्त्री बनाउनुपर्ने अडान लिएको छ । उक्त धारबाट समानुपातिकतर्फ खड्का एक्ली सांसद रहेको बताइएको छ । यही कारण उनलाई सरकारमा सहभागी गराउनुपर्ने दबाब बढेको छ ।
यता, मन्त्री बन्न आकांक्षा राख्ने अन्य सांसदहरू पनि रहेकाले मुख्यमन्त्री शाहीलाई दलभित्रको शक्ति सन्तुलन मिलाउन कठिन भएको छ । मन्त्रीको सीमित संख्या र आकांक्षी धेरै हुँदा भागबन्डाको विवाद झन् चर्किएको हो ।
सत्ता समीकरणअनुसार नेकपाको भागमा तीन मन्त्रालय परेका छन् । एमालेले भने आफ्नो भागमा परेका तीन मन्त्रालयमा यसअघि नै मन्त्री पठाइसकेको छ ।
नेकपाभित्रको आन्तरिक विवाद समाधान हुन नसक्दा कर्णाली सरकार विस्तार पुनः अनिश्चित बनेको छ । मन्त्रीको नाममा सहमति जुटेपछि मात्रै अब नयाँ शपथको मिति तय हुने बताइएको छ ।
.png)
.jpeg)
प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।