डिजिटल भविष्यको बहसमा जुट्दै विज्ञ, पाँचौँ ‘डिजिटल नेपाल कन्क्लेभ’ यसै साता

काठमाण्डौ । सूचना तथा सञ्चार प्रविधि क्षेत्रको सम्मेलन ‘डिजिटल नेपाल कन्क्लेभ’को पाँचौँ संस्करण यसै साता आयोजना हुने भएको छ । आईसीटी फाउन्डेसन नेपालले आयोजना गर्ने ‘डिजिटल नेपाल कन्क्लेभ २०२६’ भदौ ११ गते बिहीबार ललितपुरस्थित द प्लाजामा हुने भएको हो ।

यस वर्षको सम्मेलन ‘Reimagining Governance, Data and the Digital Economy’ भन्ने मूल नारामा केन्द्रित रहने आयोजकले जनाएको छ । डिजिटल नेपाल निर्माण, डिजिटल रूपान्तरण र प्रविधिमैत्री अर्थतन्त्र विकासका विषयलाई केन्द्रमा राखेर सम्मेलन आयोजना गर्न लागिएको हो ।

सरकारले सन् २०१९ मा सार्वजनिक गरेको डिजिटल नेपाल फ्रेमवर्कलाई आधार बनाएर सन् २०२० देखि डिजिटल संवाद तथा कन्क्लेभमार्फत नीतिगत बहस सुरु गरिएको थियो । पाँचौँ संस्करणसम्म आइपुग्दा सम्मेलनले सुशासन, डेटा आधारित शासन प्रणाली र डिजिटल अर्थतन्त्रलाई थप प्राथमिकतामा राखेको आयोजकको भनाइ छ ।

तीनभन्दा बढी किनोट, पाँच प्यानल र ‘पावर डाइलग’

यस वर्षको कन्क्लेभमा तीनभन्दा बढी किनोट प्रस्तुति, पाँचवटा विषयगत प्यानल डिस्कसन र एउटा ‘पावर डाइलग’ हुनेछन् ।

यस्तै, ‘डिजिटल स्पार्क’अन्तर्गत डिजिटल नेपालका लागि विकास भइरहेका १० भन्दा बढी नवीन प्रविधि तथा समाधानसमेत प्रस्तुत गरिनेछ । विभिन्न विषयका विज्ञ तथा अन्तर्राष्ट्रिय विशेषज्ञहरूको सहभागिता रहने सम्मेलनमा नेपाल सरकारका उच्च अधिकारी, प्रतिनिधिसभाका सदस्य तथा मन्त्रीहरूको समेत उपस्थिति रहने आयोजकले जनाएको छ ।

कार्यक्रममा ५ सयभन्दा बढी सहभागी प्रत्यक्ष रूपमा उपस्थित हुने अपेक्षा गरिएको छ ।

आईसीटी फाउन्डेसन नेपालका अध्यक्ष राजन लम्सालका अनुसार डिजिटल नेपाल निर्माण गर्ने सरकारको महत्वाकांक्षी योजनालाई अगाडि बढाउन निजी क्षेत्र, सरकार र अन्तर्राष्ट्रिय संस्थालाई एउटै मञ्चमा ल्याएर नीतिगत सुधार तथा कार्यान्वयनमा केन्द्रित संवाद गर्ने सम्मेलनको मुख्य उद्देश्य हो ।

उनका अनुसार सरकारले र निजी क्षेत्रले डिजिटल इकोसिस्टम, प्रविधि र नवप्रवर्तनका क्षेत्रमा गरिरहेका प्रयासलाई एकीकृत गर्दै प्राथमिकतामा ल्याउने प्रयास पनि सम्मेलनले गर्नेछ ।

नेपाली प्रविधिको प्रदर्शन

यस वर्षको सम्मेलनमा नेपालमै नेपालीले विकास गरेका ‘टिङटिङ’ र ‘थर्ड फ्याक्टर एआई’ले विशेष सहकार्य गरेका छन् । यी प्रविधिसँगै २० भन्दा बढी नेपाली प्रविधि तथा समाधान पनि प्रदर्शन गरिनेछन् ।

कार्यक्रममा टिङटिङ ओम्नी लाइभ इन्टर्याक्सन, टिङटिङ आउटबाउन्ड र टिङटिङ रेस्पोन्सिभ एजेन्टलगायत एआई प्रविधिको प्रत्यक्ष अनुभव गर्न सकिने व्यवस्था मिलाइने आयोजकले जनाएको छ ।

अनलाइन ट्राभल टिकटिङ प्लेटफर्म ‘सस्तो टिकट’ र फिनटेक कम्पनी ‘फोनपे’ कार्यक्रमका ‘Powered By’ पार्टनर रहेका छन् ।

कार्यक्रममा नास आईटी, क्यान महासंघ, एनसेल बिजनेस, स्काई आईटी, कहाँ हो, यती क्लाउड, डिशहोम, नासा एक्स, री–सेक्युरिटी, कोड एक्स स्कुल, नेपाल टेलिकम र ग्लोबल स्पार्कलगायत संस्थाको सहकार्य तथा समर्थन रहेको जनाइएको छ ।

गभर्नेन्स, एआई र डिजिटल अर्थतन्त्रमा केन्द्रित बहस

कन्क्लेभमा मुख्य रूपमा तीन रणनीतिक क्षेत्रमा छलफल हुनेछ ।

‘गभर्नेन्स एन्ड डिजिटल पब्लिक इन्फ्रास्ट्रक्चर’अन्तर्गत संस्थागत डिजिटल सुधार, नागरिककेन्द्रित स्मार्ट सेवा, एकीकृत डिजिटल पहिचान, नीतिगत नवप्रवर्तन र डेटा आधारित निर्णय प्रक्रियाबारे छलफल गरिनेछ ।

‘डेटा, एआई एन्ड साइबर सेक्युरिटी’अन्तर्गत राष्ट्रिय डेटा सार्वभौमिकता, एआईको नैतिक प्रयोग, साइबर सुरक्षा, डिजिटल विश्वास तथा विभिन्न क्षेत्रबीच डेटा अन्तरसञ्चालनको विषय उठाइनेछ ।

त्यस्तै, ‘डिजिटल इकोनोमी एन्ड इनोभेसन’अन्तर्गत डिजिटल रूपान्तरण, त्यसका लागि आवश्यक लगानीका अवसर र भविष्यको डिजिटल जनशक्तिबारे बहस हुनेछ । अन्तिम सत्रमा डिजिटल नेतृत्व र रूपान्तरणका लागि आवश्यक राजनीतिक प्रतिबद्धतालाई केन्द्रमा राखिने जनाइएको छ ।

आयोजकका अनुसार सरकार, नीति निर्माता, प्रविधि उद्योग, स्टार्टअप, लगानीकर्ता, प्राज्ञिक क्षेत्र, विकास साझेदार र युवा नवप्रवर्तकलाई एउटै मञ्चमा ल्याएर नीति संवाद, ज्ञान आदानप्रदान, लगानी अवसर तथा रणनीतिक सहकार्यलाई बलियो बनाउने सम्मेलनको लक्ष्य छ ।

कार्यक्रममा सहभागी हुन चाहनेले डिजिटल नेपाल कन्क्लेभको आधिकारिक वेबसाइटमार्फत टिकट खरिद गर्न सक्ने आयोजकले जनाएको छ ।