विपद् उद्धारमा सरकारको आपत्कालीन तयारी तीव्र, निजी हेलिकप्टरलाई सहजता

काठमाण्डौ । प्रधानमन्त्रीको अध्यक्षतामा बुधबार बिहान बसेको विपद् जोखिम न्यूनीकरण तथा व्यवस्थापन राष्ट्रिय परिषद्को बैठकले विपद्को अवस्थामा उद्धार, राहत र समन्वयका लागि देशका सबै संयन्त्र परिचालन गर्ने निर्णय गरेको छ।

बिहान ११ बजे सम्पन्न बैठकले प्रभावित क्षेत्रमा उद्धार तथा राहत कार्यलाई प्रभावकारी बनाउन सरकारी निकाय तथा उपलब्ध स्रोतसाधनलाई एकीकृत रूपमा परिचालन गर्ने निर्णय गरेको हो।

यसैबीच, अहिले आकस्मिक मन्त्रिपरिषद्को बैठक जारी छ। सरकारले राहत, उद्धार तथा खोजी कार्यमा परिचालन हुने निजी हेलिकप्टरलाई छुट्टै अनुमति आवश्यक नपर्ने निर्णय गरेको छ। आपत्कालीन अवस्थामा हवाई उद्धार तथा राहत कार्यलाई थप सहज र छिटो बनाउन यस्तो व्यवस्था गरिएको हो।

राहत, उद्धार तथा खोजी कार्यमा परिचालन हुने हेलिकप्टरका लागि आवश्यक हवाई इन्धनको आपूर्ति सहज बनाउन नेपाल आयल निगमले काठमाडौंँबाट नुवाकोटको त्रिशूलीमा तत्काल हवाई इन्धनसहितको ट्यांकर पठाएको छ।

सरकारले विपद् प्रभावित क्षेत्रमा उद्धार, राहत तथा खोजी कार्यलाई तीव्रता दिँदै आवश्यक सबै संयन्त्र परिचालन गर्ने जनाएको छ।