६ महिनादेखि तेल चोरीको जालो ? दुई ट्याङ्कर समातिएपछि आयल निगममाथि प्रश्न

 

काठमाण्डौ । भारतबाट नेपाल आयल निगमको भलवारी डिपोतर्फ ल्याइँदै गरेको पेट्रोलियम पदार्थ बीच बाटोमै निकालेर चोरी गरिरहेको अवस्थामा प्रहरीले दुई वटा ट्याङ्करसहित एक सहचालकलाई नियन्त्रणमा लिएको छ।

लुम्बिनी प्रदेश प्रहरी कार्यालय दाङबाट खटिएको विशेष टोलीले मंगलबार बिहान भैरहवास्थित सराफ आयल सेन्टरमा तेल निकालिरहेको अवस्थामा लु. २ ख १५४४ र लु. १ ख ६५०४ नम्बरका ट्याङ्कर नियन्त्रणमा लिएको हो।

प्रहरीका अनुसार दुवै ट्याङ्करको सिल तोडिएको र पेट्रोलियम पदार्थ निकालिएको अवस्थामा भेटिएको थियो।

ती ट्याङ्कर भारतबाट पेट्रोलियम पदार्थ बोकेर नेपाल आयल निगमको भलवारी डिपोतर्फ आउँदै थिए।

स्रोतका अनुसार भलवारी डिपोका लागि तेल ढुवानी गर्ने केही ट्याङ्कर व्यवसायी र आयल सेन्टर सञ्चालकको मिलेमतोमा पछिल्लो करिब ६ महिनादेखि बीच बाटोमै तेल निकालेर बिक्री गर्ने काम भइरहेको आशंका गरिएको छ।

एक ट्याङ्करबाट दैनिक ५ हजार लिटरसम्म पेट्रोलियम पदार्थ निकालेर बेच्ने गरिएको आरोपसमेत स्थानीय स्तरमा उठ्दै आएको छ। यद्यपि उक्त परिमाण र दाबीको आधिकारिक पुष्टि भइसकेको छैन।

घटनाले नेपाल आयल निगमको भलवारी डिपोको निगरानी प्रणालीमाथि पनि गम्भीर प्रश्न उठाएको छ।

पेट्रोलियम पदार्थ ढुवानी गर्ने ट्याङ्करको सिल बीच बाटोमै तोडिँदा त्यसको परीक्षण किन भएन, आयात गरिएको परिमाणको नियमित नापजाँच किन भएन र यस्तो गतिविधि लामो समयसम्म कसरी सम्भव भयो भन्ने प्रश्न उठ्न थालेका छन्।

 

यिनै आधारमा डिपोका केही अधिकारीको सम्भावित संलग्नताबारे समेत आशंका व्यक्त गरिएको छ। तर उनीहरूको प्रत्यक्ष संलग्नता पुष्टि भएको विवरण भने सार्वजनिक भइसकेको छैन।

यसअघि पनि भलवारी डिपोका लागि पेट्रोलियम पदार्थ ढुवानी गर्ने ट्याङ्करबाट तेल चोरी हुने गरेको घटना सार्वजनिक हुँदै आएका थिए।

प्रहरीले नियन्त्रणमा लिएका ट्याङ्कर र पक्राउ परेका सहचालकमाथि थप अनुसन्धान अघि बढाएको छ।

यो घटनाले पेट्रोलियम ढुवानीमा प्रयोग हुने सिल प्रणाली, ट्याङ्करको ट्र्याकिङ, परिमाण परीक्षण र डिपो प्रवेशअघि हुने निरीक्षण प्रक्रियामाथि नै छानबिन आवश्यक देखाएको छ।