१३ वर्षीया चिनियाँ बालिकाले एसियन गेम्समा जितिन् स्वर्ण पदक

काठमाण्डौ। चीनकी १३ वर्षीया पौडीबाज यू जिदीले एसियन गेम्सको पहिलो दिन महिलातर्फको २०० मिटर बटरफ्लाई स्पर्धामा स्वर्ण पदक जितेकी छन्। उनले २ मिनेट ५.।०८ सेकेन्डमा दूरी पूरा गर्दै एसियन गेम्समा नयाँ कीर्तिमान कायम गरेकी हुन्।

यू जिदीले तीन वर्षअघि आफ्नै देशकी पौडीबाज झाङ युफेईले बनाएको कीर्तिमानभन्दा करिब आधा सेकेन्ड कम समयमा दौड पूरा गरिन्। उनले आफ्नै टोलीकी चाङ मोहानलाई तीन सेकेन्डभन्दा बढीको अन्तरले पछि पार्दै स्वर्ण पदक हात पारिन्।

स्वर्ण जितेपछि यू जिदीले आफ्नो प्रदर्शनलाई ‘ठीकठाक’ मात्र भएको बताएकी छन्। उनले बटरफ्लाई प्रविधिमा अझै सुधार गर्नुपर्ने बताउँदै आफू आगामी प्रतियोगितामा अझ तीव्र गतिमा पौडिन चाहेको उल्लेख गरिन्।

उनले आफ्नो समय ०.९ सेकेन्डले सुधार गर्न सफल भएको बताउँदै आगामी पटक अझ राम्रो प्रदर्शन गर्ने विश्वास व्यक्त गरेकी छन्।

यू जिदीलाई सन् २०२८ मा अमेरिकाको लस एन्जलसमा आयोजना हुने ओलम्पिकका लागि चीनकी उदीयमान पौडी खेलाडीका रूपमा हेरिएको छ। एसियन गेम्समा उनले अझै दुई व्यक्तिगत स्पर्धामा प्रतिस्पर्धा गर्नेछिन्।

यसअघि पनि यू जिदीले १२ वर्षको उमेरमा विश्व पौडी च्याम्पियनसिपमा पदक जितेर चर्चा बटुलेकी थिइन्। उनी गत वर्ष चीनको ४×२०० मिटर फ्रिस्टाइल रिले टोलीको सदस्यसमेत थिइन्। उक्त टोलीले कांस्य पदक जितेको थियो।

यससँगै यू जिदी विश्व च्याम्पियनसिपमा पदक जित्ने सबैभन्दा कम उमेरकी पौडी खेलाडी बनेकी थिइन्।