कांग्रेसको नयाँ कार्यसमिति चयनका लागि आज मतदान, तीन स्थानमा मतदानको व्यवस्था

काठमाडौं। नेपाली कांग्रेसको १५औं महाधिवेशनअन्तर्गत नयाँ केन्द्रीय कार्यसमिति चयनका लागि आज मतदान हुँदैछ। केन्द्रीय निर्वाचन समितिका अनुसार बिहान १० बजेदेखि मतदान सुरु हुनेछ।

यसअघि बिहान ७ बजेदेखि मतदान गर्ने कार्यक्रम रहे पनि वर्षा र केही प्राविधिक कारणले समय परिवर्तन गरिएको हो। महाधिवेशनमा सहभागी ७ हजार २५५ प्रतिनिधिले नयाँ नेतृत्व चयनका लागि मतदान गर्नेछन्।

मतदानका लागि काठमाडौंमा राष्ट्रिय सभागृह, खुलामञ्च र प्रज्ञा भवनमा मतदान केन्द्र तोकिएका छन्। राष्ट्रिय सभागृहमा बागमती, प्रज्ञा भवनमा गण्डकी र लुम्बिनी तथा खुलामञ्चमा कोशी, मधेश, कर्णाली र सुदूरपश्चिम प्रदेशका प्रतिनिधिले मतदान गर्नेछन्।

भ्रातृ तथा शुभेच्छुक संस्था र जनसम्पर्क समितिबाट आएका महाधिवेशन प्रतिनिधिका लागि पनि खुलामञ्चमै मतदानको व्यवस्था गरिएको छ। प्रतिनिधिको परिचय र मतदाता नामावली रुजु भएपछि मात्र मतदान गर्न पाइने निर्वाचन समितिले जनाएको छ।