कांग्रेसको नयाँ नेतृत्व चयनका लागि मतदान सुरु, आजै मतगणना गरिने

काठमाडौँ। नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयन गर्न मतदान सुरु भएको छ। निर्वाचन समितिका सदस्यसचिव राजु कटुवालका अनुसार आज अपराह्न ३ बजेसम्म मतदान हुनेछ।

महाधिवेशनमा कुल ७ हजार ३१७ प्रतिनिधिले मतदान गर्नेछन्। राष्ट्रियसभा गृहस्थित मतदान केन्द्र ‘क’ मा बागमती प्रदेशका प्रतिनिधिले मतदान गरिरहेका छन्। यस्तै, खुलामञ्चस्थित मतदान केन्द्र ‘ख’ मा कोशी, गण्डकी, मधेस, लुम्बिनी, कर्णाली र सुदूरपश्चिम प्रदेशका साथै नेपाली जनसम्पर्क समिति तथा भ्रातृ संस्थाका प्रतिनिधिले मतदान गरिरहेका छन्।

मतदान सम्पन्न भएपछि आजै मतगणना गरिने निर्वाचन समितिले जनाएको छ।